Сумар дня на 18. вересня/септембра 2023 р.

Приносиме вам сумар медияльной ґрупы ЛЕМ.фм+ на ден 18. вересня/септембра 2023 р.

Воєвідскы Лікарі Ветеринарі просят не выпущати без опікы домовых звірят

Воєвідскы Лікарі Ветеринарі поінформували в комунікатах о плянуваных акциях вакцинациі свобідно жыючых лишок проти встеклині. В підкарпатскым воєвідстві акция зачне ся в найблизшый четвер 21. вересня/септембра, а в малопольскым воєвідстві два дни пізнійше, в суботу 23. вересня/септембра. Обі акциі потрырвают до віторка 3. жолтня/октобра. Вакцина буде метана з аероплянів і выкладана ручні, має форму бронзового диску, з притігаючым звірята запахом. Треба памятати, же кєд найдеме таку вакцину не мож єй дотыкати. В часі тырваня акциі вакцинациі лишок і через 14 дни по єй завершыню, тє. до 17. жолтня/октобра вкючно, не мож выпущати без опікы псів і котів, а в часі прогульок псы мусят быти на мотузку і в наморднику. Комунікаты находят ся на офіцияльных інтернетовых сайтах воєвідскых інспекторатів ветеринариі.

III райд «Ровером через погранича» 

Як поінформувал Маґурскій Нацийональный Парк, неодолга одбуде ся чергова, третя едиция біцильового райду «Ровером через погранича». Райд зачне ся 9. жолтня/октобра і завершыт 15. листопада/новембра. Як каждого рока, за переізд вызначеном трасом в часі тырваня акциі буде мож здобывати пакєты з нагородами. В тым році Парк зрыхтувал іх двараз веце – влони пакєты розышли ся в першых двох тыжнях тырваня райду. Інформациі про форму райду і трасы та едукацийны стрічы в рамках акциі будут неодолга поданы на сайті Маґурского Нацийонального Парку.

«NOWOSIELSKI Audiovisual» 

На конец того тыжня в Варшаві Весолій одбуде ся цікавый концерт в рамках святкувань Рока Юрия Новосільского. Од початку рока в Парохіі Божой Опікы, Осередку Культуры і Публичній Бібліотеці в Весолій ведены сут ріжного рода стрічы, прелекциі, выставы, ци проєкциі фільмів, котры мают приближыти особу і творчіст Новосільского. Концерт одбуде ся в неділю 24. вересня/септембра о год. 19.15 в римокатолицкым костелі Божой Опікы, в котрым Новосільскій робил поліхромію. В проєкті Артура Дуткєвича пн. «NOWOSIELSKI Audiovisual» малярство артисты єст інспірацийом до представліня творів о контемпляцийным характері на джазове тріо: фортепіян, контрабас і перкусию, котры лучат зо собом елементы імпровізуваной, модерной, клясийной музикы і джазу. Композициі, подібні як штука Новосільского, сут оперты на традициі сходу і заходу. Музиці будут товаришыти зсинхронізуваны зо звуком коляжы і візуализациі з фраґментами образів Юрия Новосільского в формі великоформатовых відеопроєкций, творены на жыво візуальным артистом Анджейом Вонсіком. Получыня презентациі творів маляря з контемпляцийном музиком має створити выняткову авдийовізуальну мистерию.

XXIII Нижньошлезскє Свято Меду

Уж в тот вікенд 23.-24. вересня/септембра в Пшемкові одбуде ся XXIII Нижньошлезскє Свято Меду. Офіцийне одкрытя свята пройде в суботу о 15.00 год. На вечер передвиджено першы концерты. Неділя зачне ся Божеском Літургійом в пшемківскій грекокатолицкій церкви, на котрій окрем грекокатолицкого пароха будут присутны і православный і римокатолицкій парохы з Пшемкова, як державны душпастырі пчолярів. Недільна літургія служена є каждого рока в інчым храмі Пшемкова. О 15.00 год. на сцені выступит ЛАПіТ «Ластівочка». Модерный вид лемківской музикы запрезентує пак Секция Рапу, котру можете знати хоц бы з Лемківской Ватры на Чужыні.