Сумар дня на 19. червця/юнія 2020 р.

Приносиме  вам  сумар  медияльной  ґрупы  ЛЕМ.фм+  на ден 19. червця/юнія 2020 р.

До Суду трафил акт оскаржыня в звязку з нелеґальным складовиском небезпечных одпадів в Ґорлицях

Три рокы по тым як выкрыто нелеґальне складовиско небезпечных одпадів на терені бывшой рафінериі, Ґорлицка Рейонова Прокуратура закінчыла досліджыня в тій справі. До Округового Суду в Новым Санчы трафил акт оскаржыня, тыкат він осмох осіб, дві з них то жытелі ґорлицкого повіту. Вшыткы оскаржены сут обвинены о участ з зорґанізуваній злочынній ґрупі та о злочын проти середовиску і загальній безпеці. Вшыткым горозит од 8 до 12 років в вязници. Як подає Славомир Корбеляк, заступця шефа Рейоновой Прокуратуры в Ґорлицях, ґрупа, котра діяла на обшыри Ґорлиц, єст повязана з інчыма, што найменше двома, того рода справами на обшыри малопольского і шлезского воєвідств. Через три рокы покуратура нагромадила 100 томів акт. По аналізі фінансів цілой операциі вказало ся, што оскаржены за незгідне з правом звожыня і складуваня токсичных незабезпеченых одпадів мали 2,8 млн зл зыску. Прокуратура в процесі досліджыня одкрыла, што на обшыри рафінериі зложено 5 700 тон одпадів, з чого 96 то ріжны катеґориі небезпечных одпадів, дальшых 20 то інчы як небезпечны. Вывезіня іх одтамале то тепер задача міста Ґорлиці. Кошт того то 50 млн зл.

А може на прогульку з Крениці до Бардийова або на оборот?

4. липця/юлия вертают суботні курсы медженародного автобуса Крениця-Бардиів-Бардиівскы Купелі, через Телич. Трансграничный автобус партнерскых міст Крениці і Бардийова посередничыт Комунітна Фундация Бардиів, на місци є можніст зарезервувати провідника по місті і по Бардиівскых Купелях. Автобус выізджат з Крениці о 10.00 год. і по 35 минутах є уж в Бардийові. Вертат о 15.00 год. з Бардиівскых Купелі і перед 16.00 є в Креници. Получыня буде реалізуване в кажду суботу в терміні од 4. липця/юлия до 29. серпня/авґуста.

«Коросняньска Русь на архівальній фотоґрафіі»

Заран в Етноцентрі Коросняньской Землі пройде вернісаж та авторска стріча. Орґанізатором подіі є стоваришыня «Під Карпатами» вєдно з Етноценторм. Наголовок выставы то «Коросняньска Русь на архівальній фотоґрафіі». На вернісажы презентуваны будут і книжкы з сериі «Про Коросняньску Русь» авторства Себастияна Дубєля-Дмитришына. Автор сериі – Дубєль-Дмитришын, є етнолоґом, автором і редактором парунадцетьох публикаций і дописів тыкаючых антрополоґіі польско-словацко-украіньского погранича і постсовітскых студий, тіж публикаций присвяченых Замішанцям, значыт Русинам, котры жыли на обшыри одорваной од Лемковины енклявы коло Коросна. Єст основательом выдавничой офіцины RuthenicArt.

Шатровы базы на ново одкрыти

По горах мож вандрувати на вельо способів. Єдным з них є вандруваня з наплечником і ночуваня в шатрі. На Лемковині фунґує пару місц, де мож свобідні розложыти своє шатро, є близко до воды, все палит ся ватра, а часом ночувати мож в розложеных на місци великых шатрах. Тоты місця то студентскы шатровы базы, котрыма опікуют ся студентскы кружкы провідників, якы спілпрацуют з Польскым Туристично-Краєзнавчым Товариством. Барз популярном, од десяток років, є база в Радоцині. Перед двома днями Студентскій Кружок Гірскых Провідників в Кракові, котрый опікує ся том базом, подал інформацию, што в тым сезоні база в Радоцині не буде одкрыта зо взгляду на ситуацию звязану з пошырюваньом ся коронавіруса. Але од 6. липця/юлия діяла буде шатрова база в Реґєтові, котром занимат ся Студентскій Кружок Бескідскых Провідників в Варшаві, a од 28. червця/юнія база з Завадці Рыманівскій, што єст під опіком люблиньского кружка. А ден скорше, бо 27. червця/юнія сезон одкрыют в базах в Зындрановій і Вислочку, котрыма опікує ся Студентскій Кружок Бескідскых Провідників в Ряшові.