Сумар дня на 19. квітня/апріля 2022 р.

Приносиме вам сумар медияльной ґрупы ЛЕМ.фм+ на ден 19. квітня/апріля 2022 р.

Упамятніня 75. річниці Акциі «Вісла»

В суботу, 30. квітня/апріля, одбудут ся споминовы подіі в 75. річницю Акциі «Вісла». Хотячы упамятнити тоты подіі, зыйдеме ся в місцях, якы не лем символично – але і фактично – засвідчуют про траґедию нашых дідів, родичів і дальшых поколінь Лемків. Першым пунктом в проґрамі буде одданя чести жертвам лаґру працы в Явожні при лемківскым місци памяти. Подіі в Явожні заплянувано на 11.00 год. Великодня молитва за вшыткы жертвы выгнаня вызвучыт в церкви св. Михала в неістнуючым по выселінях селі Білична о 14.00 год. Пак зобраны переіхают до Устя Руского, де о 15.00 год. під памятником в центрі села зложене буде квітя. Посліднім пунктом буде стріча, яка зачне ся о 17.00 год. в просторах ґорлицкой Руской Бурсы. До спільнотовых упамятнінь кличут вєдно Стоваришыня Лемків і Стоваришыня «Руска Бурса» в Ґорлицях.

Наша памят цілый рік

75. річницю Акциі «Вісла» хотят упамятнити і Лемкы в Америці. Подію орґанізує Lemko Hall. Упамятніня пройдут 15. мая тр. в Йонкерсі в штаті Новый Йорк. Зачнут ся панихідом, яка буде служена о 14.00 год. в православній церкви Святой Тройці в Йонкерсі. По панихіді в церковным голю зорґанізуваный буде почастунок, мож буде тіж выслухати презентациі і взяти участ в дискусиі.

Соспільны консультациі

Ґенеральна Дирекция Державных Доріг і Автострад просит до участи в консультациях проєкту «Розбудова державной дорогы нр 28 на одтинку Ропа – границя воєвідства». Неодолга пройдут інформацийны стрічы, вчас котрых будут презентуваны пропозициі проєктовых розвязань і плянувана траса дорогы. Стрічы одбудут ся в половині мая в Шымбарку – для жытелів ґміны Ґорлиці, і в Бічы – для юбителів ґміны Біч. Стрічы мают быти нагодом до бесіды і выміны поглядів на плянуваны зміны в трасі дорогы. Особливо заінтересуваны можт быти жытелі, нерухомости якых находят ся на трасі плянуваных прац. Проєктове розвязаня буде мож видіти перше в Уряді Ґміны в Ґорлицях і Уряді Міста в Бічы, як і на інтернетовым сайті проєкту. Документы будут там опубликуваны 9. мая тр. Своі увагы, внескы і пропозициі мож зголошувати уж тепер хоснуючы анкєту, котра ся находит на вебсайті проєкту. Будут они приниманы до 17. червця/юнія тр.

Здорівшый транспорт

Ґміна Ґорлиці плянує будову новых пішо-роверовых стежок. Уж неодолга мают ся зачати роботы при будові новых стежок в Кобылянці і Домініковицях. До 27. квітня/апріля тырват конкурс оферт. Проєкт має быти зреализуваный в 16 місяців. Разом стежкы мают чыслити 2,5 км. Побудувана буде і товаришуча інфраструктура. В рамках робіт мают быти пошырены одтинкы дорогы – в місцях, де ся будут находити новы пішо-роверовы стежкы. Одтинково перебудуваный буде тротуар. Появлят ся тіж одводніня, освітліня та ґратя, задачом якых буде поправити безпеку руху на трасі. Стежкы мали бы быти готовы в другій половині будучого рока.