Сумар дня на 19. мая 2025 р.

Приносиме вам сумар медияльной ґрупы ЛЕМ.фм+ на ден 19. мая 2025 р.

Русиньскє Нацийональне Свято пройде в Будапешті

В найблизшу суботу 24. мая на Мадярах пройде Русиньскє Нацийональне Свято. Торжество повязане з передаваньом Преміі ім. Антония Годинкы што рока орґанізує Вседержавне Русиньскє Самосправуваня. Каждый рік тота подія проходит в інчым місті – в тым році Русины з Мадяр одсвяткуют свій праздник в столици державы, Будапешті. Головным покровительом той подіі є Мікловш Шолтес – державный секретар Державного Секретарияту Канцелариі Премєра до реліґійных і нацийональных справ, котрый покровительство перевзял вєдно з Віром Ґіріц – представничком Русинів в Парляменті Мадяр. Свято зачне ся Акафистом в Грекокатолицкій церкви св. Михала. Дальше проґрам буде продолжал в просторах Культурного Центра ім. Йожефа Атілы в Будапешті. По одспіваваню русисньского і мадярского гымнів та святочных приговорах одбуде ся переданя нагороды ім. Антония Годины, а пак святочный проґрам з выступом фольклорного ансамблю з Гуменного. Детальный проґрам подіі найдете на нашым портали.

Жытелі Мушыны протестували під сідибом РДОС в Кракові

В минулу пятницю 16. мая в Кракові одбыл ся покойовый протест зорґанізуваный жытелями ґміны Мушына. Пришли они під сідибу Реґіональной Дирекциі Охороны Середовиска, жебы выразити незадоволіня продолжаючыма ся процедурами в справі згоды на реактивацию лыжной стациі в Щавнику. В акциі взяло участ понад сто осіб. Жытелі курорту і околиц рахуют на тото, што Реґіональна Дирекция Охороны Середовиска скоро выдаст середовискову згоду, так жебы спілка PKL (Польскы Кабельны Желізниці) встигла заінсталювати і одкрыти вытягы в Щавнику уж в найблизшым зимовым сезоні. Процедура звязана з середовисковом згодом на реактивацию лыжного осередка в Щавнику ведена єст од червця/юнія минулого рока і фурт не видно поступів в тій справі. Подля жытелів курорту діє то на некорыст ґміны Мушына і сандецкого реґіону – підчеркуют, што одколи перестал діяти вытаг, зменшыло ся обложыня в готелях в зимовым сезоні, а молоды выізджают з реґіону з причыны браку працы. Протестуючы заповіли, же кєд той згоды не буде, то в будучым місяци будут протестувати під Міністерством Климату і Середовиска в Варшаві.

В Кжешовіцах вкажут образы Епіфана Дровняка

Уж о пару дни в Кжешовіцах буде мож обзерати експозицию пн. «Никыфор. Мастер наівной штукы». Выстава буде запрезентувана в Ґалериі Vauxhall. Просят на ню Бургомайстер Ґміны Кжешовіце та Директор Центра Культуры і Спорту в Кжешовіцах. Вернісаж одбуде ся в найблизшу середу, 21. мая, докладні в 130. річницю народин артисты. Початок вернісажу о 18.00 год. «Выстава посвячена творчости Никыфора то ініциятива, котра роблена є, жебы приближыти шырокій публиці доробок єдного з найвыдатнійшых представників наівной штукы в Польщы i Европі. Експозиция презентує выбраны творы артисты, вказує його унікальный стиль, богатство тем та незвычайну вражливіст на світ» – інформує Центр Культуры і Спорту в Кжешовіцах. Експозиция буде доступна для обзераючых до 16. червця/юнія. Вступне на выставу дармо. Веце про выставу чытайте в дописі на нашым портали.