Сумар дня на 19. вересня/септембра 2024 р.

Приносиме вам сумар медияльной ґрупы ЛЕМ.фм+ на ден 19. вересня/септембра 2024 р.

Одозвы єрархів ПАКП в звязку з заливом

В звязку з катаклизмом, котрый в остатніх днях сильно вдарил в полудне Польщы, до солідарности і спертя для жертв заливы заапелювала Польска Автокефальна Православна Церков. В минулый понедільок до молитвы і спертя жерв залив закликал Православный Митрополита Варшавскій і цілой Польщы Сава. Заряджена была загальномитрополитарна колекта для жерв залив. Згідно з заряджыньом Митрополиты, владыка Паісий, архієпископ Перемышльско-Ґорлицкой Єпархіі зарядил проведіня в церквах єпаржіі колект для жерв залив. Одозву до духовенства і вірных выдал і владыка Юрий, архієпископ Вроцлавско-Щеціньской Єпархіі. В звязку з катаклизмом заливы, котра особливо вдарила в полудньовы обшыри єпархіі владыка закликал вшыткых до сильной молитвы за тых, котры втратили доробок жытя, за загыненых, за тых, котры згынули, як тіж за пожарників, войско, поліцию і вшыткы службы, котры бороли ся з силом натуры. Владыка попросил, жебы каждый в міру можливости і потребы серця влучыл ся в помочовы і благодійны акциі для потерпілых, забезпечаня і ліквідуваня наступств заливы.

Крениця Форум 2024

Вчера в Креници зачал ся конґрес Крениця Форум 2024, орґанізуваный Інститутом Косцюшкы, при спертю Малопольского Воєвідства. Форум притігат до Крениці важных політиків, лідерів бізнесу, експертів і вченых з Польщы і заграниці. Тридньова подія обнимат понад 40 тематичных панелів, в котрых выступит близко 150 прелеґентів. В тым році в часі Крениця Форум в дискусиі будут порушаны такы темы як зміцинія безпекы державы, социяльна одпорніст та економічна позиция Польщы і держав реґіону Середньо-Східньой Европы. Того рока подія першыраз єст одкрыта для шырокой публикы, не лем для експертів і децидентів. Жебы взяти участ в конференциі треба купити білет, але доступны сут тіж дармовы білеты м.ін. для студентів і матуристів.

Выстава архівальных фотоґрафій з Новиці і Прислопа

В суботу 28. вересня/септембра в Новици одбуде ся вернісаж архівальных фотоґрафій з Новиці і Прислопа. Одкрытя выставы одбуде ся о год. 19.30 в сельскій світлици в Новици. Подія одбуде ся зараз по премєрі музичного спектаклю «Дом», інспіруваного істориями жытелів Новиці і Приспопа на Лемковині, котрый зачне ся о 18.00 год. Фотоґафіі презентуваны на выставі были позысканы м.ін. підчас етноґрафічных тереновых досліджынь, в векшости од жытелів села. По опрацуваню і зархівізуваню, фотоґрафіі будут поміщены в цифровым Архіві Новиця-Прислоп. Як подала Реґіна Паздур, котра зобрала фотоґрафіі, в плянах має тіж зрыхтуваня інтернетовой версиі выставы.

Долша перерва в фунґуваню Ґондольовой Колейкы на Креницку Яворину

Од того тыжня не мож уж достати ся ґондольом на верх Креникой Яворины. Рушыл традицийный технічный перегяд перед зимовым сезоном. В тым році перегляд буде вынятково долгій, бо потырват аж 2,5 місяця. Нормально такій перегляд тырват до 3 тыжнів, але тым разом окрем звычайного перегляду будут выміняны елементы електронікы ґондолі. В звязку з тым закрыты од жолтня/октобра будут тіж реставрациі при выжній стациі Ґондолі. Ґондольова Колейка на Креницку Яворину повинна взновити діяльніст 1. грудня/октобра тр.