Сумар дня на 2. червця/юнія 2021 р.

Приносиме вам сумар медияльной ґрупы ЛЕМ.фм+ на ден 2. червця/юнія 2021 р.

Музей Лемків і Русинів з трьома одділінями: в Устю Рускым, в Зборові і Кружльові

«Забытый світ Лемків і Руснаків» – так называт ся польско-словацкій проєкт реализуваный ґміном Устя Рускє, селами Кружлів і Зборів та Словацкым Здружыньом. Його цілю є утворити спільный Музей Лемків і Русинів з трьома одділінями: єдно в Устю Рускым, в Зборові і Кружльові. В Устю музейне одділіня буде находило ся в бывшій корчмі, котра стояла посередині села на крижівці доріг в страну Высовы і Конечной. Веце як столітній будинок розобрали в звязку з будовом ронда в 2009 р., тепер поставлят го наново. Другє музейне місце найде ся в одреставруваным XVI-вічным каштели в Зборові, а третю част Музею Лемків і Русинів становила буде сельска загорода в Кружльові. В рамках проєкту буде іщы ведена історична кверенда, збераня експонатів, орґанізуваны будут і культурны подіі.

Moлили ся в русиньскых путницкых місцях

В неділю, 30. мая, в Красным Броді, коло розвалин стародавного монастырского храму отців Василиянів – в історичным путницкым місци русиньскых грекокатоликів, проходил архієрейскій одпуст з нагоды праздника Сошествія Святого Духа. Головным служытельом был на одпусті пряшівскій грекокатолицкій архієпископ і митрополита Йоан Бабяк. Тогорічне свято было выняткове, зато што посвятили новый екстерєровый літургічный простір. Tак само в бывшу неділю проходила архієрейска літургія в інчым популярным русиньскым путницкым місци – на св. Горі Явір. Молили ся гын православны, особливо православна молодіж зосереджена в Братстві Православной Молодежы Перемышльско-Ґорлицкой Єпархіі. Літургію в неділю про Самаритянку та Собор Карпаторусиньскых Святых – праздник православных Карпат, целебрувал владыка Паісий.

 «Ани мак» в русиньскым театрі

По долгій перерві звязаній з пандемійом коронавіруса і ограничынями, што протидіют пошырюваню ся заражынь, єдиный професийный русиньскій театр – Театр Александра Духновича в Пряшові, наново зачал выступувати на сцені і принимати в своі порогы публику. Уж в пятницю на Великій Сцені театру в Пряшові пройде І премєра пєсы пн. «Ани мак». Спектакль піднимат барз актуальну тему звязану з одношынями чловека і природы, влияньом ґлобализациі на енвіромантальне оточыня, з жытьом чловека в ХХІ ст. далеко од природы, а близко технолоґічного ґратя. Спектакль режысерує Петра Ковальчыкова при асисті Осифа Пантлікаша. ІІ премєра заплянувана єст на середу, 9. червця/юнія.

10 років ЛЕМ.фм – специяльне выданя проґраму нажыво

З нагоды проходячой вчера, 1. червця/юнія, десятой річниці істнуваня радия ЛЕМ.фм просиме Вас, слухачів нашого радия, на специяльне выданя проґраму нажыво, котре пройде в пятницю, 4. червця/юнія, од 17.00 год. При єдным столі, перед мікрофонами зыйдут ся бывшы і теперішні робітникы радия, побесідуєме о початках радия, припомнеме, хто протягом тых 10 послідніх років рыхтувал для Вас проґрамы, постараме ся о дакы чысла. Не може бракнути Вас – тых найважнійшых, про котрых ся стараме – нашых слухачів. Будте з нами вчас нашого празднуваня – найблизша пятниця, 17.00 год. Просиме!