Сумар дня на 2. червця/юнія 2023 р.

Приносиме вам сумар медияльной ґрупы ЛЕМ.фм+ на ден 2. червця/юнія 2023 р.

Ден дітины в Рускій Бурсі

Вчера, 1. червця/юнія святкували сме Медженародный Ден Дітины. З той нагоды уж заран в просторах нашой Руской Бурсы в Ґорлицях одбуде ся Інтеґрацийный Пікнік з нагоды Дня Дітины. Стріча зачне ся од показовой пробы молодшoй ґрупы ансамблю Терочка (10.00 год.), пак будут спільны забавы. Додатковом атракцийом буде огниско (коло полудня) з печыньом кобаскы. Пікнік буде орґанізуваный завдякы дотациі Міністра Внутрішніх Справ і Адміністрациі. Красні просиме вшыткы діти і іх родичів – опікунів. До стрічы уж заран!

Засідня ОСРС

Днес в Пряшові проходит 35. засіданя членів Округлого Стола Русинів Словациі, котре скликал його председа Петро Штефаняк. Проґрам стрічы будут творити інформациі з засідань народностного выбору і активности Председництва Округлого Стола. На засіданю будут обговорены і схвалены концепциі одборных комісий, як наприклад комісиі про культуру, шкільництво, історию, церков, реґіональный розвиток і самосправу. Темом Округлого Стола будут тіж рыхтуваня до святкуваня Дня Русинів на Словациі, котре зачне ся 11. червця/юнія. Ден Русинів на Словациі празнуваный єст на памятку подіі з 12. червця/юнія 1933 р., коли то на Леґіонарскым намістю в Пряшові одкрыто памятник Александра Духновича.

Лемківскє Літо в Чмелю

Такой о тыжден, в суботу 10. червця/юнія одбуде ся в Чмелю на Нижнім Шлеску дальша едиция подіі пн. «Лемківскє Літо», яка єст орґанізувана православном парохійом св. Тройці в Любіні. Як все, одбуде ся она на сельскым спортовым пляци. Зачне ся о год. 14.00. В проґрамі м.ін. выступы лемківскых і сусідскых ансамблів. В тым році буде несподіванка, кєд же на подіі выступит єден з ансамблів з Лемковины – бо бурсяна Терочка. Выступлят тіж м.ін. Ластівчата, Розтока, Вороны, АПіТ Ліґниця ци Вороны. Окрем того буде мож покоштувати традицийны лемківскы стравы, што зрыхтуваны будут місцевыма ґаздынями, будут і атракциі для діти, а тіж конкурсы лемківской співанкы і рецитациі.

Рушат потяг з Попраду до Мушыны

3. липця/юлия выстартує з літнім сезоном потяг Попрад-Татры – Стара Любовня – Мушына. Буде ходил в каждый вікенд аж до 3. вересня/септембра. О тым інформувал м.ін. Пряшівскій Самосправный Край. Путуючы, котры куплят си вступне на потяг, здобудут знижку єдно евро на одвиджыня граду Любовня і скансену, котрый під градом ся находит. Потяг буде кажду суботу і неділю раз іти дополудня з Попраду і Мушыны, а раз пополудни з обох стаций. Денно так підут штырі потягы. Кінцьовом стацийом Беляньского експресу є Мушына по польскій страні границі. В місті буде мож видіти памяткы, множество атракций і здравотны джерела. В Мушыні сут забезпечены і желізницьовы получыня до Крениці.