Сумар дня на 2. червця/юнія 2025 р.

Приносиме вам сумар медияльной ґрупы ЛЕМ.фм+ на ден 2. червця/юнія 2025 р.

ВД 892 буде змодернізувана в рамках черезграничной спілпрацы

В ґміні Команча зачала ся долго ждана інфраструктуральна інвестиция. Іде о модернізацию воєвідской дорогы но. 892 од скрижуваня з воєвідском дорогом но. 897 до границі державы. Інвестиция єст реализувана в рамках проґраму Інтерреґ Польща-Словация 2021-2027. Проєкт єст ефектом спілпрацы партнерів з обох сторін границі – польской і словацкой – і обнимат ремонт веце як 8 км дорогы: 5 км по польскій стороні і близко 3 км по словацкій. В рамках інвестициі буде м.ін. зміцнена верхня конструкция, вымінена єй структура в місцях выступуваня переломів, як і зліпшыня тырвалости придорожа. Змодернізуваны будут зъізды, мелийорацийны каналы, перепусты та паркінґовы місця, в тым тоты пристосуваны до потреб неполносправных осіб. В пляні єст тіж очыщыня терену з кряків, ремонт укріплінь і выконаня нового ознакуваня. Інвестиция має стратеґічне значыня – хоснуют єй жытелі, але і туристы з Польщы і Словациі.

Зачала ся реконсрукция скансену в Бардиівскых Купелях

Шаришскій музей в Бардийові, котрым завідує Пряшівскій самосправный край, зачал реконструкцию свого скансену в Бардиівскых Купелях. Проєкт під назвом ”Музей – мій часопростір” реализує музей з польскым партнером, котрым є Музей ремесел в Коросні, в рамках проґраму Interreg Польща – Словация 2021-2027. Як інформувала пряшівска жупа, цільом европроєкту є заховати культурну дідовизну, укріпити ролю культуры і утримательного туристичного руху в господарскым розвитку, социяльній інклюзиі і социяльных інновациях на польско-словацкым приграничы, а в непосліднім шорі піднести атракцийніст Шаришского музею. В рамках проєкту буде проведена будівляно-технічна однова 20 обєктів – хыж, деревяных храмів, сыпанців, дзвінниц, ковальской шмыкні і дальшых. Дрібниці чытайте в дописі на нашым портали.

Свято в грекокатолицкій церкви в Ґладышові

В четвер 29. мая, в свято Вознесіня Господнього, грекокатолицка громада в Ґладышові одсвяткувала свій парохіяльный праздник. На тогорічный праздник до Ґладышова пришол владыка Євген, архієпископ і митрополита перемышльско-варшавской архієпархіі грекокатолицкой Цервки в Польщы. Окрем предстоятеля єпархіі і місцевого пароха о. Ярослава Чухты, в богослужынях взяли участ і дальшы священникы краківско-ґорлицкого деканату, а тіж місцевый римокатолицкій священник. Веце на тоту тему прочытате на нашым портали.

МНП прекєрує туристичный рух на природничо-історичну стежку ”Ольховец”

Маґурскій Нацийональный Парк отримал дофінансуваня з Европейскых Фондів на Інфраструктуру, Климат, Середовиско 2021-2027 на реализацию проєкту: ”Охорона велькых драпіжників в Маґурскым Нацийональным Парку через зміну орґанізациі туристичного руху в його полудньовій части”. В рамках задачы будут выконаны такы задачы як: прекєруваня туристичного руху на природничо-історичну стежку ”Ольховец”, разом з выконаньом цифрового провідника, введіня систему здального моніторінґу туристичного руху на обшыри парку, як і едукацийны діяня. Заміріньом проєкту єст піднести атракцийніст природничо-історичной стежкы ”Ольховец” та анализа туристичного руху при схоснуваню модерной технолоґіі, што злегшыт завідуваня цілом хороненом обшырю. Кошт інвестициі то близко 2,5 млн злотых.