Сумар дня на 2. червця/юнія 2026 р.
Приносиме вам сумар медияльной ґрупы ЛЕМ.фм+ на ден 2. червця/юнія 2026 р.
XXI Конкурс Рецитациi Лемківской Поезиi для дiты
29. мая в будинку Осередка Праваславной Культуры «Ельпiс» в Ґорлицях одбыли ся переслуханя в рамках XXI Конкурсу Рецитациi Лемківской Поезиi. В подіi участ взяло понад 60 ученикiв основовых шкіл, котры змагали ся в парох віковых катеґориях, представляючы творчіст лемківскых поетів з ріжных літературных періодів. Конкурс од років становит важну форму популяризациi лемківского языка i літературы твореной в тым языку. Участникы репрезентували публичны і непубличны школы, в котрых ведене є вчыня лемківского языка. Згіднi з реґуляміном каждый з рецитуючых представлял два творы ріжных авторів, што давало шансу вказати стилістичну і тематичну ріжнорідност лемківской поезиi.
Засіданя структур Нацийонального Совіту Русинів
30. мая в Новым Садi в Сербii одбыло ся встановлююче засіданя двох структур, што дiют в рамках Нацийонального Совіту Русинів: Ґрупы за науку i Ґрупы за молодых. Стріча мала орґанізацийный характер і становила формальный початок дiяльности обох ґруп. Ґрупа за науку буде ся занимала ініциятивами звязаныма з досліджынями, документуваньом i популяризацийом знань о языку, істориi і культурі Русинiв. Єй ведучым є др Юлиян Рамач, а функцию його заступника обнял др Михайло Фейса. Ґрупа за молодых зосередит ся на дiяльности, яка тыкат молодого поколіня, влучнi з едукацийныма, культурныма і інтеґрацийныма проєктами. Ведучым той ґрупы є Дарко Заґорац, а його заступцьом стал Петро Хромыш. Оба тіла мают дорадчо-координуючый характер і мают за ціль підтримувати розвиток культурных і науковых ініциятив в рамках русиньской спільноты у Войводині.
Діґітализация метрикальных актів Ряшівской Єпархіi
Польскє Ґенеалоґічне Товариство оголосило на своiх социяльных медиях, же зачали ся роботы над новым проєктом діґітализациі метрикальных актів. Наступном єпархійом, з котром Товаристо рiшыло спілпрацувати, є Ряшівска Єпархія.
Была она створена в 1992 р. через выділіня обшыри з перемышльской i тарнівской єпархій. Дуплікаты метрикальных книг триманы в архівах тых двох єпархій лишыли ся там — не были переданы до новоствореного Архіву Ряшівской Єпархіi. Прото скануваны будут ориґінальны книгы, котры находят ся в парохiяльных канцеляриях. З той причыны, мимо підпоры Ряшівской Куриі, послiднє рішыня о тым, ци дозволити на скануваня, належыт до каждого поєдного пароха. Сканы будут публикуваны на сайті Сканотека. Польскє Ґенеалоґічне Товаристо діє офіцийнi од 2006 р. Веде базу індексів Ґенетека та базу сканів Сканотека, в котрых мож найти архiвальны iнформациi з рiжных части Польщы.
Фестіваль Микова 2026
25. липця/юлия в Миковій на cхiдній Словациi одбуде ся Фестіваль Микова 2026. Подія навязує до Енді Варголя, котрого коріня сiгают точно того русиньского села. Не буде то перша едиция фестівалю. Был він орґанізуваный роками, тепер вертат по парох роках перервы спричыненой пандемійом. Тогорічна подiя має єднати русиньску культуру, сучасну штуку i дідицтво родины Варголів. Ма ся то стати за причыном чысленных концертів, выступів, варштатів та інчых активности приготовленых орґанізаторами. Веце о проєкті можете чытати на сайті StartLab.
—-
Фотоґрафiя: rusyn.sk
Повязаны дописы
Ґорлиці 106,6 MHz
Наш порталь можете чытати чысто дармо, але кєд маш охоту - можеш нас спомочы. Буде нам барз мило!
Жебы спомочы нас даком вплатом, без ниякых зобовязань, втисний притиск або зоскануй код QR.
Nasz portal jest darmowy, nie mamy (i nie chcemy) na nim reklam. Jeżeli masz ochotę - możesz wesprzeć naszą codzienną pracę.
Aby wspomóc nas jednorazową wpłatą, bez żadnych zobowiązań, kliknij przycisk lub zeskanuj kod QR.
