Сумар дня на 2. мая 2023 р.

Приносиме вам сумар медияльной ґрупы ЛЕМ.фм+ на ден 2. мая 2023 р.

«Мастер і ученик» – серед нагородженых ученик з Лемковины

Державный Інститут Культуры і Спадковины Села оголосил результаты другой едициі конкрсу «Мастер і ученик». До стипендияльного проґраму зголосили ся народны творці, артисты, ремісникы та ученикы, котры під фаховым оком Мастерів хотят досконалити своі здібности. Цілю проґраму єст підтримувати локальны традициі і здібности, та продолжати творчіст характеристичну для даного реґіону. Особливо спераны сут діяня, што сут рідкы і загорожены загыбаньом. Того рока серед понад 130 внесків пересланых до конкурсовой капітулы, стипендию признано 22 парам мастер-ученик, а серед нагородженых нашол ся тіж ученик з Лемковины – Петро Криницкій, котрый в найблизшым часі буде ся школил в штуці артистичного різбліня в дереві в мастера Богдана Карела.

Підкарпатскій ліс в 1944 році а тепер

Реґіональна Дирекция Державных Лісів в Коросні одкрыла порталь, де мож собі порівнати актуальны фотомапы з німецкыма аеропляновыма фотоґрафіями. Знимкы зробили німецкы пільоты, котры в 1944 р. выкорыстували іх до рыхтуваня воєнных діянь. Документация нашла ся при нагоді гляданя ІПН-ом єдной з воєнных могыл. Товды тіж вказала ся думка одкрыти сайт, де мож буде порівнати фотоґрафіі з актуальныма знимками. Як підкрислил єден з істориків, знимкы сут новым джерелом істориі Бєщадів і Низкого Бескіду, вказуют они, де находили ся хыжы, цмонтері, церкви ци дорогы. Вказуют тіж, як через тот час змінил ся лісовый екосистем. Порівнаня знимок полудньовой части підкарпатскых лісів з часів ІІ світовой войны і теперішніх часів находит ся на сайті ґеопорталь-крайовый.

Сут результаты Нацийонального Повселюдного Списуваня 2022 в Сербіі

В минулым тыжни Сербскій Республиковый Уряд про Статистику опубликувал результаты Нацийонального Повселюдного Списуваня веденого в 2022 р. Подля него в Сербіі прожыват понад 6,6 млн жытелів, а то о піл мілийона менче як при попереднім списі. Найвекшом меншыном сут Мадяре, за нима Боснякы, Ромове і Альбанці, але і гев спис вказал, же жытелів каждой з нацийональности єст менче. Подібні з Русинами, при минулорічным списі близко 11,5 тис. жытелів окрислило свою нацийональніст як русиньску, а то о 3 тис. менче як в списі веденым в 2011 р. Велика част жытелів Сербіі окрислила ся за «Югославянів», але і гев спис вказал, што при попереднім списуваню жытелів, котры деклярували таку приналежніст, было більше.

Роверовый Райд по Лемковині

Заран 3. мая пройдут роверовы змаганя «XII Бескідскій Клясик». Райд зачне ся о 10.00 год. в Лоси, а пак участникы переіхают через Климківку, Чарну, Снітницю, Ганчову, Шквіртне, Реґєтів, Смерековец, Квятон, Одырне до Кунковой. Мета находит ся на вершку в Ліщынах. Орґанізатры поінформували, што для безпекы участників рішено о часовым закрытю даякых одтинків доріг на час райду. Трасу поділено на 10 одтинків, а каждый з них буде закрытый од піл годины до максимальні двох годин.