Сумар дня на 2. мая 2025 р.

Приносиме вам сумар медияльной ґрупы ЛЕМ.фм+ на ден 2. мая 2025 р.

Здройовый Парк в Креници перейде метаморфозу

Ґміна Крениця отримала понад 9,5 млн злотых на ревітализацию Здройового Парку на Парковій Горі. Креницкій Здройовый Парк формуваный єст од 1810 р. То єдиный в Польщы парк, в котрым неє пласкых обшыри. Тепер перейде метаморфозу. Заряд Малопольского Воєвідства рішыл дофінансувати 22 проєкты в проґрамі Европейскы Фонды для Малопольщы на рокы 2021-2027, признаючы дофінансуваня на реализацию тых інвестиций в квоті 89 млн злотых. З того нецілых 10 млн было признане на заґаздуваня обшыри Здройового Парку в Креници (близко 66,5 га). Конкурс оферт має быти оголошеный в тым місяци. Проєкт передвидує м.ін. модернізацию алейок, выміну покрытя біциґльовых стежок, модернізацию малой архітектуры, задбаня о зелін і новы насаджыня, ревітализацию аквенів, як і замонтуваня будок для малых звірят. Аж по сам верх Парковой Горы положеный буде ґранітовый тротуар – тепер находят ся там іщы довоєнны камені. Плянувана єст тіж розбудова тематичных загорід на Парковій Горі о новы насаджыня і елементы звязаны з еколоґічном едукацийом, м.ін. з улями для пчіл. В рамках проєкту будут і ведены діяня в обшыри еколоґічной, природничой і климатичной едукациі направлены на молодых жытелів Крениці, як і польско-словацкы варштаты тыкаючы зелено-синьой інфраструктуры. Інвестиция має быти зреализувана до кінця 2026 рока.

Неодолга рушыт нова стация уздатняня воды в Ропі

Уж на зламі мая і червця/юнія тр. жытелі части ґорлицкого повіту будут мочы хоснувати воду з Заливу Климківка, в звязку з завершыньом будовы стациі уздатняня воды в ґміні Ропа. Інформувал о тым війт ґміны Ропа Кароль Ґурскій. Тепер воды фурт бракує, а част жытелів довозит воду до студні з Ґорлиц. Нова стация має запевнити жытелям доступ до велькой кількости доброй якости воды. Санітарны службы выдали уж рішыня позваляючы на хоснуваня стациі. Ґміна мусит ся іщы розрахувати з цілого проєкту. Стация буде уздатняля близко 40 кубиків воды на годину. Пак вода буде перепомповувана і маґазинувана в двох резервуарах в Климківці і Ропі.

Днес і заран в Ждыни заграют спектакль «Бомбель»

Стоваришыня ім. Мирка Нагача «Білый сокіл» та Меджепоколіньова Tеатральна Ґрупа Племя просят на Театральный Майовый Вікенд. Каждый, хто іщы не виділ спектаклю «Бомбель», зрыхтуваного на основі оповіданя Мирка Нагача, буде мал таку нагоду днес і заран. Як і перше, сценом для акторів з ґрупы Племя буде колиба на обшыри Лемківской Ватры в Ждыни. Спектакль буде презентуваный 2. і 3. мая. о 21.00 год. Вступне – 35 зл. Скінчыла ся уж можливіст онляйновой резервациі місц, але орґанізаторы інформуют, што мило виджены будут і особы, котры рішат появити ся спонтанічно. Припоминаме, што «Бомбель» перезначеный єст лем для дорослых обзерачів.