Сумар дня на 2. серпня/авґуста 2021 р.

Приносиме вам сумар медияльной ґрупы ЛЕМ.фм+ на ден 2. серпня/авґуста 2021 р.

Конкурс «Вколо Кременаросу – Чловек – природа – культура»

Бєщадскій Нацийональный Парк інформує, што выдолжат термін высыланя прац до фотоґрафічного конкурсу пн. «Вколо Кременаросу – Чловек – природа – культура». Фотоґрафіі мож іщы буде зголосити до конкурсу до 23. серпня/авґуста. Конкурс єст направленый на пасийонатів фотоґрафіі з Польщы і Словациі выже 16 рока жытя. Цілю конкурсу єст заінтересувати познаваньом унікатной природничой і культурной дідовизны сусідуючых нацийональных парків – БНП і НП Полонины. Як припоминают природникы, на познаня бєщадского краєвиду, полонин, лісів і іх жытелів позваляют м.ін. ознакуваны в терені два трансграничны шлякы. Конкурс єст реализуваный в рамках мікропроєкту «При джерелах польско-словацкого погранича – чловек, природа і культура» і орґанізуваный во спілпрацы з Нацийональным Парком Полонины на Словациі.

Уродины БНП – атракциі для наймолодшых

Бєщадскій Нацийональный Парк просит тіж наймолодшых до святкуваня уродин Парку. Подія одбуде ся 7. серпня/авґуста в Волосатым. В проґрамі гры, едукацийны забавы, прогулькы на гуцульскых конях ци спільны співы при огниску. Додатковом атракцийом будут астрономічны варштаты – діти будут мати нагоду збудувати сонечный зыґар і моделі плянет і Сонечной Системы та обізріти показы апарату сонця през сонечный телескоп.

Ден і ніч в Санковій

В тоту пятницю, 6. серпня/авґуста, в рамках підсумуваня мікропроєкту пн. «Деревяна архітектура – забытковы скарбы погранича» з Проґраму Трансграничной Спілпрацы Інтерреґ Польща – Словация 2014-2020 одбуде ся «Ден і ніч в Санковій». Подія зачне ся о 19.00 год. выступами музичных ансамблів. Запрезентуют ся Ручай, Співоча Ґрупа «Разом» і Юлия Дошна з Товаришыньом. На год. 20.10 заплянувана єст емісия фільму о культурово-природничій дідовизні польско-словацкого погранича. Подіі буде товаришыла деґустация реґіональной кухні. Акцию «Ден і ніч в Санковій» будут трансмітувати онляйн.

Театральны Стрічы Інновиця – колекта

Члены Стоваришыня Приятелів Новиці уж штырнадцетый раз хотят зорґанізувати в Новици фестіваль Театральны Стрічы Інновиця. Тогорічна едиция плянувана єст на дни од 2. до 4. вересня/септембра. Подія отримала в тым році дофінансуваня Міністерства Культуры, Нацийональной Спадковины і Спорту та Фундациі Польско-Німецкой Спілпрацы. Жебы зреализувати плянуваный проґрам, потрібне єст іщы 8 тис. злотых. З той причыны Стоваришыня просит о спертя при реализациі ХІV Театральных Стріч Інновиця 2021, што мож зробити беручы участ в колекті на сайті zrzutka.pl. Як пишут орґанізаторы, фестіваль єст правдивым артистичным феноменом і хыбаль єдным з остатніх в державі соспільні орґанізуваных «свобідных фестівалів».