Сумар дня на 2. січня/януара 2023 р.

Приносиме вам сумар медияльной ґрупы ЛЕМ.фм+ на ден 2. січня/януара 2023 р.

Веце автобусовых получынь з Высовой до Тарнова

Од 1. січня/януара 2023 р. збільшыла ся частота автобусовых курсів на леніі Тарнів – Высова. До диспозициі пасажерів будут тепер по три получыня в обі стороны. Рахуюча 97 км траса то найдолше получыня зо списку, якій нашол ся в договорі о дофінансуваня з урядового Фонду Розвитку Автобусовых Перевозів, якій підписали м.ін. малопольскій воєвода Лукаш Кміта і маршалок Вітольд Козловскій. Фінансовый вклад мают мати і ґміны находячы ся на трасі автобусів та повітове староство. Ленія фізично дале буде обслугувана фірмом LS. Оператором леніі сут Малопольскы Желізниці, а задача буде реализувана в рамках Автобусовых Довозовых Леній, скомунікуваных з потягами Малопольскых Желізниц. В обі страны пасажеры будут мати коло 15 мин. на пересідку з або до потягу реляциі Тарнів – Краків. Автобусы будут курсувати і в вікедны.

Дария Шкурат остала Мастерком Польщы в лыжных бігах

Радо приносиме віст о дальшых успіхах Дариі Шкурат, Лемкыні родом з Бортного, яка од парох років занимат ся лыжныма бігами. В минулым тыжни в Закопаным проходил Чемпіонат Польщы Сеньорів сезону 2022/2023 в дистансовых бігах. Дария Шкурат остала Мастерком Польщы Сеньорок на дистансі 10 км свобідным стильом. 18-річна Дария репрезентує Спортовый Клюб Хохолів. То другій медаль тогорічного Чемпіонату Польщы для Дариі Шкурат. Ден перше Дария здобыла срібрный медаль в бігу клясичным стильом. Серед остатніх успіхів молодой спортсменкы мож спомнути на высокє, 3. місце в катеґориі бігу юньорок на дистансі 10 км свобідным стильом, якє заняла в змаганях Alpen Cup в австрийскым Санкт Ульріх.

Признаны стипендиі для здібной молодежы з сельскых обшыри

Стоваришыня Любителів Села Рогы, Фундация Monmonde та Товариство для Розвитку Музею Лемківской Культуры в Зындрановій признали стипендиі для здібной молодежы, яка зачала студиі в академіцкых осередках. При спертю Фундациі Едукацийного Підприємництва повело ся признати шіст стипендий. Молодіж, яка отримала підпору, мусіла сполнити одповідні критериі. Головны то прожываня на сельскых теренах, результаты з матурального еґзаміну, окрисленый дохід в родині. Стипендия має помочы молодежы зробити першый крок по тым, як зачне студиювати, а пак спертя може быти продолжане в догваріню з Фундацийом Едукацийного Підприємництва. Завдякы тогорічній спілпрацы орґанізаций повело ся розшырити обшыр, з якой были выбераны студенты – серед стипендистів нашла ся тым разом і Лемкыня Мелянія Пелехач.

Новорічны желаня од нашого радия

А на конец хочеме передати вшыткым вам новорічны желаня. Витаючы Новый 2023 Рік, желаме миру, щестя, здоровля і вшыткого, чого си лем захочете. Най же цілый 2023 рік буде про нас о вельо ліпшый, як старый. Вшыткого доброго желат радийо Лем.фм і Стоваришыня «Руска Бурса» в Ґорлицях.