Сумар дня на 20. липця/юлия 2023 р.

Приносиме вам сумар медияльной ґрупы ЛЕМ.фм+ на ден 20. липця/юлия 2023 р.

Міністер затвердил принципы признаваня дотаций на 2024 рік

Міністер Внутрішніх Справ і Адміністрациі Мариюш Каміньскій затвердил принципы поступуваня в справі признаваня дотаций на реализацию в 2024 році задач, котрых цілю є охорона, захованя і розвиток культурной достоменности нацийональных і етнічных меншын та розвиток реґіонального языка, котры вымінены сут в Уставі з дня 6. січня/януара 2005 р. о меншынах. Інформацию о тым, помістил вчера офіцийный сайт Міністерства Внутрішніх Справ і Адміністрациі. Інформация о принципах поступуваня, вєдно з залучниками доступна єст на реченым сайті. В однесіню до минулых років значучо змінят ся формуляр для выполняня плянуваных до реализациі задач – з дотеперішніх внесків на оферты реализациі публичной задачы, котры сут о вельо барже розбудуваны. Оферты буде мож складати на три способы: традицийні – паперьову оферту переслати почтом до Міністерства, в формі електронічного документу пересланого і підписаного посередництвом плятформы ePUAP та через дедикуваный меншынам систем ЕСУД – Електронный Систем Уділяня Дотаций. І хоц терміны складаня оферт на цільовы дотациі то: до 1. вересня/септембра, а підметовых дотаций аж і скорше – до кінця серпня/авґуста, то специяльні запроєктуваный Міністерством систем ЕСУД не єст іщы зактуализуваный о новы формулярі. Міністер Внутрішніх Справ і Адміністрациі інформацию о признаню дотаций подаст до 22. грудня/децембра, о тыжден пізнійше, як в минулых роках.

Ватра уж о хвилю

Явил ся проґрам найблизшой, 43. Лемківской Ватры на Чужыні в Михалові. Імпреза, котрой орґанізатором є Стоваришыня Лемків, буде нагодом, по перше, жебы стрітити ся серед своіх люди, побесідувати в рідным языку, послухати артистичных выступів, а тіж, слідом попередніх ватр – взяти участ в конкурсах знаня для діти, конкурсах для дорослых або спортовых змаганях. Як што рока вручана буде в пятницю нагорода Епіфана Дровняка – Никыфора, а новістю буде суботній Перегляд Молодых Твороців – Молоды Таланты. Символичні спомнена буде і чергова річниця выгнаня – Акциі «Вісла». Зза сусідской меджы запрезентуют ся Вілямівяне – то маленька етноґрафічна ґрупа, котра жыє в околици Бєльско-Бялой, бесідуюча своім языком – вілямівскым, маюча свій характеристичный крій. На сцені не бракне і постійных артистів михалівской ватры, а то Ластівочка і Ластівчата, Кычерка, н’лем folk, Скеция Рапу, Зоря, Розтока, выступлят тіж Капеля Древутня, Бурян, Тераборсук, а до нічных забав грати будут Демай і Водограй.

«При Джерелах» і при звуках

В пятницю 21. липця/юлия і в суботу 29. липця/юлия пройдут два концерты в рамках VIII едициі Медженародного Фесітвалю «MUZYKA U ŹRÓDEŁ / При Джерелах». Першый з выміненых пройде під наголовком «Ікона писана музиком» в Ґотицкым Домі в Новым Санчы, є то одділіня Округового Музею в Новым Санчы. Концерт «Ora Pro Nobis. Памяти св. Маргариты» буде нагодом, жебы почути Мариюша Мончака на гушлях і Роберта Адамчака на фортепіані. Буде то світова премєра композициі Ora Pro Nobis авторства Кжыштофа Нєґовского. Другій з концертів, што пройде кінцьом місяця, одбуде ся в музейній цекрви свв. Космы і Даміяна в Бортным. «Тобі співаме. Димитрий Бортняньскій in memoriam» буде концертом, в которго проґрамі почуєме очывидно композициі Бортняньского, але репертуар буде ся складал іщы з лемківскых пісен і світовых клясиків клясичной музикы. Выступлят: тенор Назар Тацишын, Юлия Дошна, на гушлах Мариюш Мончак і Віктор Шмайда на фортепіані. Вступне на оба концеры дармо.

Діти з цілого світа будут презентувати свій фольклор

В неділю зачынат ся 30. едиция Свята Діти Гір – то Медженародный Фестіваль Дітячых Реґіональных Ансамблів. Інавґурацийном подійом буде перехід молодых артистів зо світа в неділю 23. липця/юлия улицями Нового Санча. В фестівали запрезентуют ся дітячы ансамблі пісні і танця з гірскых обшыри зо вшыткых континентів. Концертувати будут м.ін. в Креници, Щавници, Лимановій, але головні в сали Малополського Центра Культуры Сокіл в Новым Санчы. Дрібниці найдете на сайті swietodziecigor.pl.