Сумар дня на 20. лютого/фебруара 2026 р.

Приносиме вам сумар медияльной ґрупы ЛЕМ.фм+ на ден 20. лютого/фебруара 2026 р.

Выстава фотоґрафій з колекциі Діґітального Соспільного Архіву Ґміны Устя Рускє

Уж днес в будинку Туристичной Інформациі «Стара Реміза» в Высовій одбуде ся вернісаж выставы фотоґрафій з колекциі Діґітального Соспільного Архіву Ґміны Устя Рускє. Вказаны будут 22 знимкы выбраны спосеред соток фотоґрафій згомадженых в рамках творіня архіву. На стрічы реализаторы проєкту: Реґіна Паздур і Мацєй Кудлацік будут шырше оповідати о зобраній колекциі і цілым архіві. Початок о 17.00 год.

Пополудне з фільмом «Потопа» в Музею Русиньской Культуры в Пряшові

Словацкій Нацийональный Музей – Музей Русиньской Культуры в Пряшові рыхтує пополудне з фільмом «Потопа», в режысериі Мартіна Ґонды. Подія пройде 5. марця о 16.00 год. і буде обнимала дискусию з творцями. Вступне 5 евро. З огляду на ограничене чысло місц конечна єст резервация. Дрібниці найдете на фейсбуковым сайті Музею Русиньской Культуры в Пряшові. «Потопа» то першый постсоциялистичный граный фільм, котрый розповідат історию выселяня при будуваню водного резервуару Старина, котре проходило в роках 1981-1988 недалеко Снины. З причыны будуваня того резервуару счезли з мапы світа русиньскы села Старина, Звала, Смольник, Велика Поляна, Рускє, Дара і Стужниця. Фільм выроснул з оточыня русиньской соспільности і награный был в русиньскым языку. По успішным одпремєруваню на вызначных медженародных фільмовых фестівалях, в грудни/децембрі минулого рока фільм трафил до словацкых кін. Образ был барз добрі принятый не лем серед русиньской публикы. Як в остатнім часі подала Словацка Фільмова і Телевізийна Академія, «Потопа» добыла разом 9 номінаций до фільмовых нагорід Сонце в сіти за 2025 р., номінациі здобыли тіж акторы.

Дальшы подіі товаришучы выставі «Формы присутности. Штука Лемків/Карпатскых Русинів»

В тым місяци в Державным Етноґрафічным Музею в Варшаві пройде іщы дакілько подій товаришучых выставі «Формы присутности. Штука Лемків/Карпатскых Русинів». В найблизшу неділю 22. лютого/фебруара одбуде ся дальше опроваджаня, якє поведе куратор выставы др Михал Шымко. Пак, в віторок 24. лютого/фебруара в музею буде мож выслухати выклад на тему Акциі «Вісла» і єй наслідств для лемківской соспільности. Выклад выголосит проф. др габ. Ґжеґож Мотыка – директор Войскового Історичного Бюра, працівник Інституту Політичных Студий Польской Академіі Наук. В остатній ден місяця, в суботу 28. лютого/фебруара буде чергове опроваджаня пн. «Іконы Лемковины», якє поведе Аґнєшка Клещ. Дрібниці о вшыткых подіях находят ся на інтернетовым сайті Етноґрафічнного Музею в Варшаві.

В музею POLIN о лемківскым языку

21. лютого/фебруара празднуваный є Медженародный Ден Материньского Языка. З той нагоды Музей Iсториi Польскых Жыдiв POLIN в Варшаві просит на цикль подій, обзераня часовой выставы «Сила слів» та варштаты посвячены языкам. Серед запрошеных гости не бракне представника лемківской меншыны. Єдным з центральных пунктів проґраму буде стріча пн. «В языкм языку бє серце?», котра одбуде ся в найблизшу неділю 22. лютого/фебруара о 16.00 год. В бесіді участ возмут представникы кашебской, шлезской і лемківской спільноты. Лемків репрезентувал буде редактор нашого радия – Демко Трохановскiй. Дрібниці про стрічу прочытате в дописі на нашым портали.