Сумар дня на 20. мая 2025 р.

Приносиме вам сумар медияльной ґрупы ЛЕМ.фм+ на ден 20. мая 2025 р.

40 років скансену під градом Любовня

В четвер 15. мая в Любовняньскым Музею святкували 40 років сприступліня Музею Народной Архітектуры – скансену, котрый находит ся під градом Любовня. В святкуваню участ взяло понад 70 гостів, в тым директоры і робітникы музеів народной архітектуры на Словациі, члены Уніі Музеів в природі, цінены етноґрафы, представникы самоурядів ци бывшы робітникы музею. Перед святкуваньом участны помолили ся молебен в деревяній грекокатолицкій церкви святого Михаіла Архістратига, котра є в скансені і походит з села Матысова. В дальшій части проґраму была презентация «голосів етнік», котры іщы не мают свойой материяльной презентациі в забудові скансену. Презентувано артистичну спадковину Ромів, Жыдів і Німців. Артистичну част в церкви одкрыли і закрыли ґрупа Поляна і Шамбрінці. Скансен одкрытый в 1985 році презентує штоденне жытя бывшых жытелів выжнього Спиша і Шариша, в тым Русинів. На тоту хвилю в збірках скансену находят ся 32 обєкты.

Ревітализация желізницьовой леніі но. 108  то найбільша того типу інвестиция в реґіоні од декад

Понад 1,2 мілиярда зл буде перензачене на ревітализацию желізницьовой леніі но. 108 з Ясла в страну Бєщадів. То найбільша того типу інвестиция в реґіоні од декад. PKP оголосило, што конкурс на проєкт, а пак реализацию будовы выграла фірма PORR S.A. Проєкт закладат комплексову модернізацию на цілым одтинку леніі но. 108 разом з перебудовом перонів, модернізацийом переіздів та ревітализацийом торів і системів стеруваня рухом. То причынит ся до звекшыня безпекы і доступности желізницьового транспорту, што переложыт ся на розвиток туристикы. Реализация проєкту може быти першым кроком в страну дальшых модернізаций, в тым перебудовы трасы Ґорлиці-Ясло.

«Никыфор. Матейко з Крениці»

Музей Дворы Карвациянів і Ґладышів в Ґорлицях просит на річницьову выставу «Никыфор. Матейко з Крениці» з нагоды 130. річниці народжыня артисты. На выставі презентуваных буде 86 прац маляря, в більшости невказуваных скорше шырокій публиці. Творы походят зо збіркы Центра Культуры в Креници та Музею Никыфора в Креници. Вернісаж выставы, разом з музичном оправом ансамблю, котрый запрезентує лемківскы пісні, пройде в четвер 29. мая. Додатково, музей буде орґанізувал додатковы подіі і атракциі, як напр. артистичны варштаты для діти. Плянуваны сут тіж авторскы стрічы получены з премєром і промоцийом публикациі о Епіфані Дровняку, а при спілпрацы з лемківскыма орґанізациями орґанізувана буде наукова конференция присвячена артисті з Крениці. Выставу мож буде обзерати до 13. липця/юлия.

3. Лемківскє Співаня. в Высокым

Припоминаме, што Ґмінный Центр Культуры Ґміны Рудна просит на 3. Лемківскє Співаня. Подія пройде в суботу 24. мая в Высокым. Стріча зачне ся о 13.00 год., а першом атракцийом буде перехід в хороводі ансамблів. На сцені запрезентуют ся ЛАПіТ «Кычера», Ластівочка, Розтока, Поляне, Сасанка, Н’Лем Фольк, Дамир, Надія і Лемкус. Орґанізаторы задбали і о додатковы атракциі, выставы, буде презентация народной творчости і варштаты. Не бракне забав для наймолодшых. Патронами подіі сут KGHM to my і ініциятива Gmina Rudna łączy ludzi.