Сумар дня на 21. липця/юлия 2026 р.

Приносиме вам сумар медияльной ґрупы ЛЕМ.фм+ на ден 21. липця/юлия 2026 р.

Ювілейный рiк блаженных Павла Петра Ґойдича і Василия Гопка

В пятницю 17. липця/юлия в пряшівскым Катедральным Соборі Святого Йоана Крестителя святкувано праздник блаженного пряшівского єпископа і мученика Павла Петра Ґойдича. Пряшівскій архієпископ митрополита Йона Максим при тій нагоді одслужыл архієрейску літургію. На єй конец владыка і священникы в бiчнiй капличци, де сут мощы священномученка Павла Петра Ґойдича, помолили ся молебен ку блаженному. Завершыньом торжества было оголошыня ювілейного рока блаженных єпископів мучеників Павла Петра Ґойдича і Василия Гопка. Тот ювілейный рiк буде святкуваный в Пряшівскій Архієпархіi од 4. листопада/новембра того рока і тырвал буде до 5. листопада/новембра 2027 р. Буде то рік річниц єпископскых хіротоній пряшівскых єпіскопів. 25. марця 2027 р. пройде точно 100 років од єпископской хіротоніi владыкы Ґойдича в Базилиці Святого Климента в Римі, а 11. мая 2027 р. буде 80 років од єпископской хіротоніi владыкы Гопка, котра одбыла ся в пряшівскым Катедральным Соборі Святого Йоана Крестителя.

Выпадок потягу на ленii Верхомля – Пивнична

В пятницю 17. липця/юлия на леніi медже Верхомльом а Пивничном зышол з торів товаровый потяг. Шiст порожніх ваґонів выпало з торів, а част з них впала до Попраду. Подля інформаций служб – нихто не был раненый. В звязку з аварийом, рух потягів на леніi ч. 96 был i фурт є затриманый, а на одтинку Новый Санч – Крениця введено автобусову заступчу комунікацию. Як інформувало ПКП Польскы Желiзничны Ленii, аж по тым, як вытягнены будут ваґоны з рікы, мож буде зачати полный ремонт торовиска. Дотепер не подано терміну, коли рух потягів на тій лініi буде цілком приверненый.

«Од Русаль до Яна» в Зындрановій

В найблизшый вікенд 25.-26. липця/юлия Музей Лемківской Культуры в Зындрановій просит на свято «Од Русаль до Яна». В рамках суботнього проґраму, од 16.00 год, предвиджене єст звиджаня музею, промоция книжок і стрічы з авторами, выклады і доповіди, показы ремесла, конкурсы, а тiж положыня квітя в місцях памяти. О 18:00 год. одбуде ся концерт, в котрым выступлят Гудаци і Гудобна Ґрупа Еста. Ден завершыт ся огниском. Недільный проґрам одкрыє богослужыня в церкви св. Миколая в Зындрановій. Пак о 13.00 одбуде ся офіцийне одкрытя подіі і концерт, в котрым запрезентуют ся Свидницкы Геліґонкарі, Капеля Дукляне, Ославяны, Калина, Маковиця, Мариянна Железна і Гоґаш, Карпатія, Гудаци та Бурян. Окрем того будут показ ремесла, конкурсы і забавы. I тот ден завершыт ся огниском.

Туристичны шлякы для слiпых і слабовидячых осiб

В Бескіді і Бєщадах доступны сут штирі туристичны шлякы, приготовлены з думком о слiпых і слабовидячых особах. Новый систем TotuPoint помагат безпечні перемiщати ся в терені та злегчат орєнтацию при помочы мобільной аплікациі, котра передає голосовы інформациі о трасi і найблизшых пунктах. На шлаках поставлены сут специяльны інформацийны табличкы з кодами TotuPoint, мапы з выпукненыма елементами, описаны языком Брайля, а тіж просторовы макєты, котры помагают ліпше познати околицю. Розвязаня сут приготовлены так, жебы особы з проблемами з зором могли самодільні і безпечні одкрывати природничы і культурны атракциі реґіону. В Бескіді Низкым систем діє на шляку «Видіти Низкій Бескід» в Вiльхівци, а в Бещадах сут то трасы «Видіти Бєщады» в Мучным, «Видіти Солину» на хырбетi пасма Жукова. Четверта траса находит ся на теренi Музею Народного Будівництва в Саноку. Проєкт реализувала Бещадска Ґрупа GOPR при фінансовым спертю Самоуряду Підкарпатского Воєвідства.