Сумар дня на 21. мая 2025 р.

Приносиме вам сумар медияльной ґрупы ЛЕМ.фм+ на ден 21. мая 2025 р.

Поломництво до бывшого лаґру в Явожні

В минулу суботу 18. мая, з благословліня Высокопреосвященного Архієпископа Перемышльского і Ґорлицкого Паісия одбыло ся поломництво до бывшого лаґру в Явожні, зорґанізуване православном парохійом св. Владиміра в Креници. Пасхальный парастас при памятнику вознесеным на місци ґруповой могылы вязнів лаґру правил о. митрат Петро Пупчык. Памятник тот был одкрытый в 1989 році товдышніма президентами Польщы і Украіны. По молитві Мелянія Клинковска, дівка явожняньского вязня, якій николи не вернул з лаґру, одчытала фраґменты книжкы описуючой долю Явожнаків. В дальшій части Петро Трохановскій одчытал свій верш «Явожно» та верш «Березы біленькы» Івана Горощака. Посліднім етапом упамятнінь был перехід на місце, де давнійше был лаґєр і зложыня квітя під памятником, якій посвячено лемківскым жертвам Центрального Лаґру Працы в Явожні. Сес памятник, поставленый з ініциятивы Стоваришыня Лемків, был одкрытый в 2017 році. Упамятніня закінчыло спільне одспіваня гымну «Горы нашы». В упамятнінах участ взяли, окрем креницкых парохіян, лемківска спільнота з Бортного, Ждыні, Конечной, Смереківця, а тіж з Вроцлавя, Зимной Воды і Лісця.

Як жыє русиньска меншына в Войводині?

Студенты з Ягайлоньского Університету разом з др. габ. Томашом Квоком, в днах од 8. до 17. мая перебывали на студийній візиті в Войводині. В Новым Саді і Рускым Керестурі ближе познали м.ін. функцийонуваня русиньскых інституций і орґанізаций. Парудньовый выізд до Сербіі проходил в рамках проєкту «Войводина, мозаіка языків і культур». Студенты одвиділи м.ін. Матицю Сербску, Інститут Культуры Войводиньскых Русинів та Пресово-Выдавничый Інститут «Рускє Слово». Гостили і на Філософічным Выділі Університету в Новым Саді, взяли участ в стрічы в Рускым Культурным Центрі. Проґрам студийной візиты, яку заплянувал і зорґанізувал др габ. Томаш Квока, обнимал докладне познаня ріжных аспектів і елементів реализациі прав меншын в Сербіі. Ґрупа была тіж в Бельграді, де бесідували з представниками польской амбасады і Польского Інституту.

13. Русиньскій Фестіваль зачатый!

Через цілый тыжден в Свиднику проходит 13. річник Фестівалю Культуры Русиинів Словациі – Русиньскій Фестіваль, котрого головным орґанізатором є Окресна Орґанізация Русиньской Оброды в Свиднику. Орґанізаторы і тот раз приготовили проґрам на цілый тыжден. До четверга проходят ріжного рода товаришучы акциі. В пятницю зачне ся головна част фестівалю – в свидницкым амфітеатрі, і потырват до неділі. В тым часі буде тырвал тіж 6. річник Фестівалю Орфеус – музичной переглядкы авторской русиньской творчости. Окрем ПУЛЬС-у, выступлят тіж м.ін. словацкы популярны вокалисты як Алян Мурін ци Адам Дюріца. Субота і неділя буде належала головно домашнім колективам і гостям, і буде переважно в фольклорным духу. Вступне на фестіваль мож придбати на сайті www.rusinskyfestival.sk.

Президентскє одзначыня для проф. Александра Наумова

Президент Анджей Дуда одзначыл проф. Александра Наумова Офіцерскым Крестом Ордеру Одроджыня Польщы за «выдатны заслугы в популяризуваню знаня о східній християньскій традициі в Польщы і на світі та за осягніня в науково-дослідничій і дидактичній роботі» – як подано в лявдациі. Проф. Александер Наумов то выдатный славіста, літературознавця, палеославіста, церквиста, медєвіста і історик культуры. Науково звязаный м.ін. з Ягайлоньскым Університетом, Університетим ім. А. Міцкєвича в Познані ци Університетом в Венециі. Был єдным з першых, окрем Юрия Новосільского ци проф. Александра Роґова, котрый активні влучыл ся в роботу редакциі новооснованого в 1985 році «Православного Перегляду» – загальнопольского православного соспільно-реліґійного місячника, першого в повоєнній Польщы. Проф. Наумов єст автором понад 200 публикаций, членом медженародных комітетів, комісий. Вюл тіж ґрупу науковців, котры перевели на польскій язык знаный Супрашльскій Кодекс.