Сумар дня на 21. серпня/авґуста 2020 р.

В наслідстві бурі, яка была в минулу середу, 19. серпня/авґуста, в Пивничній, вельох мешканців міста втратило єдину дорогу домів. Нічна буря тырвала лем парунацет минут. Ляло єднак так міцно, што гірскы потокы замінили ся в рвучы рікы. Вода забрала 300-метровый фалат дорогы ведучой до осіля Trześniowy Groń. Конечна буде будова нового одтинка трасы. Тепер на місци роблят копаркы. Треба стягнути знищены плыты і почыстити ровы. На цілу дорогу будут высыпаны дрібны камені, жебы вернути доізд до осіля іщы пред вікендом. Зышла ся тіж земля з одтинком дорогы, што веде до єдного з домів в інчій части міста. Нона дорога єст тіж хоснувана надлісництвом до транспорту дровна. Власти Пивничной будут ся старати в воєводы о фінансову поміч в одбудуваню обох одтинків.

Фундация Вілля Сократес разом з Музейом Ікон в Супрашли, Одділіньом Підляшского Музею в Білымстоку просят на вернісаж выставы «Преображыня. Юрий Новосільскій, Леон Тарасевич», якій пройде заран, тє. в суботу, 22. серпня/авґуста, о 16.00 год. в Музею Ікон в Супрашли при ул. Кляшторній 1. Ідея выставы в тым, жебы запрезентувати ікону Преображыня на Горі Тавор з марця 1961 рока авторства Юрия Новосільского в реляциі з концепцийом «site-specific» зрыхтуваном Леоном Тарасевичом. Термін вернісажу єст повязаный з датом свята Преображыня, якє притігат православных поломників з цілой Польщы на Святу Гору Ґрабарку. Там тіж першыраз стрітили ся артисты, вчас літнього іконоґрафічного табору для молодежы. Стріча на Ґрабарці была імпульсом до наступных. Бесіды ведены з Новосільскым на темы православля, теолоґічных і філософічных проблемів влинули на формуваня ся пізріня Тарасевича на малярство і штуку. Вчас тырваня експозициі буде зрыхтуване выдавництво з текстами критиків і теоретиків штукы на тему творчости обох артистів, а тіж фотоґрафічна документация з презентуваной выставы. Публикация буде доступна дармо на фінісажы выставы, якій пройде 5. грудня/децембра 2020 р.

Ґорлицкій Центр Культуры і Містецкій Уряд в Ґорлицях просят на музичне закінчыня літа. В послідній вікенд серпня/авґуста, тє. 29. і 30., на ґорлицкым рынку пройде шеста єдиция фолькового фестівалю 4 Страны Карпат. В суботу од 18.00 год. презентувати ся будут Капеля Карпатска Люна, Анджеля Ґабер і Капеля Малішів. В неділю од 18.00 год. буде мож видіти выступы ґруп Вовакін і Бескідянс. Вступне на подію дармо.

Бєщадскій Нацийональный Парк зрыхтувал для туристів специяльну аплікацию на мобільку «Бєщады & Выжній Сан», завдякы котрій мож самому одкрывати дикы терены выжнього Сану, вздолж польско-украіньской границі. Аплікация єст доступна в польскым, словацкым і анґлицкым языках. Сут в ній заміщены фотоґрафіі, сферичны панорамы і моделі 3Д неістнуючых сакральных обєктів. До природничо-історичных пути «В долині выжнього Сану» і «Тарнава Нижня-Дзвиняч Выжній» сут зрыхтуваны специяльны авдийобукы. Аплікация была створена в рамках мікропроєкту «Світ природы і култьтуры Східніх Карпат – спільна промоция – ліпша охорона» спілфінансуваного Европейском Унійом з Европейского Фонду Реґіонального Розвитку і державным буджетом, в рамках Проґраму Трансграничной Спілпрацы Інтерреґ Польща-Словация 2014-2020. Аплікацию мож придбати дармо і мож єй хоснувати тіж офляйн.