Сумар дня на 21. серпня/авґуста 2026 р.

Приносиме вам сумар медияльной ґрупы ЛЕМ.фм+ на ден 21. серпня/авґуста 2026 р.

Саноцкій скансен зас одкрытый для одвиджаючых

Од вчера саноцкій скансен – Музей Народного Будівництва в Саноку зас єст одкрытый для туристів. До звиджаня сут доступны секторы: Ґалицийскій Рынок, Бойків, Лемків, Пастырскій, Долинян, Дворскій, Археолоґічный, Нафтовый, Західніх Погіран та дакотры выставы. Вылучена зо звиджаня є част Східньопогірняньского секотра. Там же кінцьом минулого тыжня дошло до пожару, в якым згоріл забытковый костел з ХVII ст. і потерпіли два сусідні будинкы сектора східніх Погірян. На місци працувало 140 пожарників, завдякы чому повело ся вратувати решту загороженых забудувань. Причына появліня ся огня не єст іщы знана.

Анімация «Еха» буде презентувана на дальшых вызначных фільмовых фестівалях

Анімация «Еха» о втраті і памяти, інспірувана насильным выселіньом Лемків з 1947 рока, буде презентувана днеска підчас загальнопольского фестівалю незалежных фільмів Solanin Film Festiwal в Новій Соли, в рамках конкурсу анімациі. Дальше, кінцьом того місяця, анімация вкаже ся в Кыйові на найвекшым на Украіні фестівали незалежной анімациі і штукы медий Linoleum Contemporary Animation and Media Art Festival. Перше, в минулым місяци, анімация нашла ся серед найліпшых в Польщы і вказана была в головным конкурсі Польскых Анімуваных Фільмів підчас Медженародного Фестівалю Анімуваных Фільмів АНІМАТОР в Познані. Авторком анімациі єст Йоанна Фучко – лемківска інтердисциплінарна артистка з Зеленой Горы. Більше о анімациі можете ся дознати з інтервю з його авторком на нашым портали.

Высова з найліпшыма результатами оціны якости повітря в Малопольщы

Головный Інспекторат Охороны Середовиска зробил додаткову річну оціну якости повітря за 2025 р., в звязку з введіньом новой директивы Европейского Парляменту і Рады Европейской Уніі. Як подала Туристична Інформация Стара Реміза в Высовій, результаты тых помірів сут барз задоваляючы. Уж днес результаты помірів на терені ґміны Устя Рускє сут пониже новых, барже вымагаючых рівни якости повітря, што будут обовязувати в дальшых роках. Подля принципів, што будут обовязувати од 2030 р., максимальный річный рівен ПМ10 в повітри то 20 міліґрамів на кубик, а в Высовій сігат він лем 12 міліґрамів. Окрем того директива допущат 18 дни в році, коли ПМ10 в повітри єст веце як 45мґ/м3. В Высовій не однотувано ани єдного такого дня. Так само низшый од доцільового вказал ся рівен бензо(а)пірену. Што важне, помірова стация в Высовій была єдином в малопольскым воєвідстві, де середній річный рівен бензо(а)пірену не перекрочыл доцільовой нормы.

Практичны варштаты о AI в Рускій Бурсі

Стоваришыня «Руска Бурса» в Ґорлицях просит на безплатны практичны варштаты о штучній інтеліґенциі в соспільным активізмі. Стріча пройде в найблизшый понедільок о 17.00 год. в будинку Руской Бурсы. Варштаты поведе др габ. інж. Павел Малецкій, проф. Технічного Університету в Кракові. Стріча єст направлена на жытелів, особы діючы соспільні, позаурядовы орґанізациі і вшыткых заінтересуваных тым, як новы технолоґіі можут підпорювати громадяньскє заанґажуваня і розвиток локальных сопсільности. Участникы дознают ся м.ін.: як хоснувати АІ до соспільных і громадяньскых діянь, як анализувати документы, стратеґіі і соспільны консультациі, як зрыхтувати писма, петициі і внескы, як скорше дотерати до публичной інформациі та як хоснувати нарядя АІ одповідальні і успішні. Варштаты сфінансувано з середків Нацийонального Інситуту Свободы – Центру Розвитку Громадяньского Соспільства в рамках Урядового Проґраму Фундуш Громадяньскых Ініциятив NOWEFIO на рокы 2023-2030.

Джерело фотоґрафіі: Muzeum Budownictwa Ludowego w Sanoku