Сумар дня на 22. червця/юнія 2023 р.

Приносиме вам сумар медияльной ґрупы ЛЕМ.фм+ на ден 22. червця/юнія 2023 р.

ХІІ Русиньска Ватра

В днях 7.-9. липця/юлия в Малым Липнику на Пряшівщыні загорит ХІІ Русиньска Ватра, головным орґанізатором якой є молодіжне общество Молоды.Русины. Проґрам зачне ся в пятницю о 19.00 год. на головній сцені од школы народного співу з Іваном Брілловом. Пак буде концерт – вечер русиньскых голосів. Суботній головный концерт зачне ся о год. 16.30. Выступувати будут русиньскы колективы, якы представлят цілу мозаіку русиньского реґіону на Словациі. На год. 20.30 заплянуваный єст тематичный проґрам пн. «Вода». Пізным вечером, коло 22.00 год. одбуде ся ефективне розпаліня великой ватры з круговыма танцями. Окрем того вчас цілой подіі буде мож смакувати русиньскы стравы. Не бракне і активности для діти. В неділю орґанізаторы запрашают до участи в грекокатолицкій літургіі, по котрій буде концерт духовной музикы. Проґрам глядайте на нашым портали.

Проф. Маґочій презентувал історичный атляс

В віторок 20. липця/юнія одбыла ся в просторах Музею Русиньской Культуры в Пряшові презентация словацкого выданя книжкы «Карпатска Русь. Історичный атляс» проф. Павла Роберта Маґочія. Словацка версия вышла в 2022 р. в Выдавництві Пряшівского Університету і є перекладом анґлицкого ориґіналу, котрый был друкуваный в 2017 р. в Канаді. Презентацию публикациі за участи автора модерувал доцент Владимір Фенич з Ужгорода. Проф. Маґочій пояснювал, подля якых принципів были роблены окремы тексты і мапы, котры ся в книзі находят, чом собі выберал даны принципы, але бесідуваны были і дальшы темы, якы прямо або непрямо были повязаны з книжком. По презентациі прошла дискусия, в рамках котрой мож было давати звіданя. Проф. Маґочій в тых днях дає і лекциі в рамках Studium Carpato-Ruthenorum – Медженародной Літньой Школы Русиньского Языка і Культуры. Книжка «Карпатска Русь. Історичный атляс» має множество якістных історичных мап і текстів.

Державны Лісы фурт вытинают карпатскы лісы

Природникы алярмуют! Лем за вельо нич тото не дає. Державны Лісы надале вытинают карпатскы лісы. На нашых очах зникают прастары дерева. Што кус можеме чути о тым, же поєдны активісты ци векшы орґанізациі інформуют, што з карпатскых лісів вывозят великы фуры дерева. Рахує ся, што денно близко 40 тягаровых авт вывозит зрубаны дерева. Ситуация є о тілько драматична, же гынут дерева, якы сміло могли бы быти в нормальных обставинах рахуваны за памятникы природы. Парадоскальні інституция Державных Лісів, яка мала бы хорониты богатство лісів, постепенно іх деґрадує. Лем на ранті вартат додати, што великє чысло з тых дерев было засаджуваных нашыма предками, пак были они безправно зрабуваны в рамках акциі «Вісла».

ІнНовиця 2023

Під конец ближучых ся вакаций одбудут ся в Новици XIV Театральны Стрічы ІнНовиця 2023. Орґанізаторами подіі сут Стоваришыня Приятелів Новиці разом з Ґмінным Осередком Культуры в Устю Рускым. Подія тырвала буде од 31. серпня/авґуста до 2. вересня/септембра. ІнНовиця то театральный перегляд, фестіваль творчости, де мож стрітити вшелеякы театральны ґрупы з Польщы і заграниці. Того рока на новицкых сценах окрем польскых акторів видіти буде мож колективы з Украіны, Італиі ци Німеччыны.