Сумар дня на 19. червця/юнія 2026 р.

Приносиме вам сумар медияльной ґрупы ЛЕМ.фм+ на ден 19. червця/юнія 2026 р.

Становиско Меншыновой Стороны СКУтНіЕМ в звязку з фальом ксенофобіі і неґуваньом громадяньскых прав членів меншын

В понедільок 15. червця/юнія Меншынова Сторона Спільной Комісиі Уряду та Нацийональных і Етнічнчых Меншын выдала становиско в звязку зо збільшаючом ся в публичным просторі фальом ксенофобіі та одкрытым неґуваньом громадяньскых прав осіб, што приналежат до нацийональных і етнічных меншын. Тыкат то медже інчыма выповіди дакотрых політиків і публицистів, котры выкликали явиско масового гейту і языка ненависти направленой на меншыны. Як чытаме в становиску, підважаны сут основны громадяньскы права осіб, што належат до нацийональных і етнічных меншын, в тым і право до захованя меншынами власной традициі, культуры, языка, достоменности і історичной памяти. Меншынова сторона Комісиі апелює підняти діяня цілю протидіяня дискримінациі осіб належачых до меншын в політичным, соспільным, економічным, освітовым ци культурным жытю та діяня запевняючы меншынам почутя безпекы, в тым підчас реализуваня нима своіх конституцийных прац для захованя власной достоменности, языка і культуры. Полне становиско мож прочытати на фейсбуковым сайті меншыновой стороны Комісиі.

Лемківскы темы на Форум Языковой Ріжнорідности

Од середы до заране в Барцелоні одбыват ся Форум Языковой Ріжнорідности – Language Diversity Forum. То медженародна подія посвячена языковій ріжнорідности, што орґанізуваня є через стоваришыня Linguapax і проєкт FOSTERLANG. Форум громадит експертів, активістів і представників соспільности з цілого світа, жебы дискутувати о явыковых правах, ревітализациі языків і о выкликах, якы звязаны сут з міґрацийом і культурном ріжнорідністю. Буде і лемківска част. Уж заран одбуде ся варштат пн. Практичны рекомендациі, котры підперают соспільно-економічну і языкову стабільніст меншыновых і локальных соспільности. Бадачы з Валиі, Шкоциі, Краю Басків і з Польщы запрезентуют на ним вступны результаты бадань над соспільністями, котры старают ся ожывити своі языкы, єдночасно економічно ся зміцнити. Серед языків, о котрых буде бесіда, є і лемківскій – при валийскым, шотляндскым, кашебскым, вілямівскым і баскійскым. Того самого дня в інчым варштаті выступит Олена Дуць-Файфер. Разом з активістками з Чіле, Мексику і Канады будут бесідувати о досвідчынях діяня для корінных языків в ріжных ґеоґрафічных і культурных контекстах. До варштату мож долучыти онляйн. Проф. Олена Дуць-Файфер буде бесідувала по лемківскы, выстуліня буде тіж переведене на анґлицкій, іспаньскій і каталоньскій языкы.

Пряшівскій архієпископ і митрополита Йона Максим мал душпастырску візиту в Канаді

Од неділі 8. червця/юніа до четверга 18. червця/юніа тр. пряшівскій архієпископ і митрополита Йона Максим был на душпастырскій візиті в Канаді. На запрошыня владыкы Курта Бурнетта, єпархіяльного єпископа Пассаіку (ЗША), котрый є єдночасно і апостольскым адміністратором Еґзархату свв. Кірила і Методия в Торонто, митрополита одвиділ вшыткы штырі парохіі еґзархату. Веце о візиті владыкы Йоны в Канаді дознате ся з допису на нашым портали. Першы грекокатоликы з териториі днешньой східньой Словациі пришли до Канады на зламі 19 і 20 столітя. В 1980 році выникла Єпархія свв. Кірила і Медтодия в Торонто, котра была записана як єпархія словацка. По реорґанізациі в 2022 році была тота церковна структура підпорядкувана під юрисдикцию русиньской Піттсбуржской митрополиі.