Сумар дня на 23. червця/юнія 2021 р.

Приносиме вам сумар медияльной ґрупы ЛЕМ.фм+ на ден 23. червця/юнія 2021 р.

Повселюдне Списуваня 2021 – рахмайстры зачынают дуркати до дверів

Днес рахмайстры зачынают выходити в терен. Кєд сте ся іщы не списали ани через інтернет, ани через телефон – до Вашых двери може задуркати рахмайстер. Участ в Нацийональным Повселюдным Списі Жытелів і Мешкань є обовязкова, не мож одмовити передати даны рахмайстрови. Каждый рахмайстер має ідентифікатор, а як мате вантпливости, можете провірити ідентичніст рахмайстра на сайті списуваня rachmistrz.stat.gov.pl, задзвонити на інфоленію під номер 22 279 99 99 або задзвонити на поліцию. Каждый, хто іщы ся не списал, не мусит ждати на рахмайстра – фурт може тото зробити через інтернет або інфоленію. Каждый, хто спише ся через інтернет, буде брал участ в лотериі.

Новы члены Верховного Трибуналу Апостольской Сиґнатуры

Як інформує порталь Vatican News, в понедільок, 21. червця/юнія, папа римскій Франциск призначыл на пятрічный період членів Верховного Трибуналу Апостольской Сиґнатуры. Медже дванадцетьома особностями ріжных нацийональности спомедже кардиналів, архієпископів і єпископів, є і архієпископ Кірил Василь, апостольскій адміністратор sede plena Кошыцкой Грекокатолицкой Єпархіі. Папа Франциск єдночасно призначыл і семох референтів Верховного Трибуналу Апостольской Сиґнатуры спомедже академічных фаховців в обшыри канонічного права латиньской церкви і східніх католицкых церкви. Верховный Трибунал Апостольской Сиґнатуры є єдным з урядів Римской Куриі, є і верховным судом, і єдночасно верховным орґаном церковной юстичной справы і справной юстициі Святого Престола.

В Зборові ярмак. Дальша част проєкту «Карпатскы Брамы: Медже Ропом а Зборовом…»

В суботу, 26. червця/юнія, в Зборові пройде ярмак св. Йоана. Присутны будут ремісникы, выробникы ручной роботы артефактів, в проґрамі є і презентация рыцарскых ґруп. Ярмак є орґанізуваный в рамках проєкту пн. «Карпатскы Брамы: Медже Ропом а Зборовом – охорона і розвиток спільной культуровой спадковины на польско-словаскым пограничы». Ярмак буде трансмітуваный тіж онляйн на сайті села zborov.sk. До участи в ярмаку запрашат шолтыс села Ян Шуркала.

Єст в Вапенным, буде і в Польковицях

В Польковицях в рамках Польковицкого Громадяньского Буджету побудуют загальнодоступну солянкову інгаляторию. Обєкт буде ся містил в Центральным Парку Забав і Выпочынку, буде мал форму шестикутной деревяной шопы з центральном стіном з тернины. До кінця червця/юнія буде переданый пляц будовы, а сама інгалятория має быти готова протягом трьох місяців, значыт до кінця вересня/септембра. Докола будут стояти лавкы. Акция побудувати інгаляторию є задумана предовшыткым для сеньорів. Дыханя повітрьом богатым в цінны мікроелементы (прим. йод, бром, калий, маґнез, желізо, содиюм) поправлят самопочутя, реляксує, додає енерґіі, очыщат дыхальны шлякы в тілі, зміцнят іммунітет. Подібна інгалятория діє уж на Лемковині, в курортным селі Вапенне.