Голосник

Сумар дня на 23. грудня/децембра 2020 р.

Приносиме вам сумар медияльной ґрупы ЛЕМ.фм+ на ден 23. грудня/децембра 2020 р.


 Зміны в парохіях Вроцлавско-Щеціньской Єпархіі

Канцелярия Православного Архієпископа Вроцлавского і Щеціньского Юрия подала до публичной відомости в минулый понедільок, 21. грудня/децембра, особовы зміны в парохіях Вроцлавско-Щеціньской Єпархіі. Окремыма декретами принято, што: о. Ярослав Шмайда перестає душпастырювати в Ґожові, признає ся му парохію в Лешні Ґурным в місце о. митрата Ігоря Поповича. Отец митрат Славомир Кондратюк перестає быти парохом парохіі в Михалові, а о. Адам Горбаль переходит з парохіі в Мальчыцях до Михалова. Дальшым рішыньом є вызначыня о. прот. Любомира Воргача на становиско учытеля в Школі Церковного Співу в Цєпліцах в місце о. Томаша Мендрицкого, якій мануваный был парохом парохіі в Ґожові. На основі чергового декрету о. Артур Ґрабан, на час здравотного урльопу о. Жорначука, обнимат адмініструваня парохійом в Валчы.

Е. Місіло і його книга про Явожно. Фурт мож присылати материялы

По двох роках Евгеній Місіло закінчыл по части труд писаня публикациі о вязненых в лаґрі в Явожні. Першый з томів єст готовый. Посвяченый єст 550 вязненым засудженым на кару смерти або вязниці через суд в Кракові та 200 замордуваным в лаґрі. Серед них находило ся вельох Лемків. В книжці, яка чыслит веце як 600 сторін, нашло ся більше як 200 фотоґрафій. Автор кінчыт роботу над другом книгом, в котрій будут поміщены назвиска і біоґрамы 4 тис. вязненых та іх реляциі. Дотепер повело ся му найти 500 фотоґрафій вязненых і веце як 100 функцийонерів УБ і кадры лаґру. Фурт іщы актуальный є апель автора публикациі о присыланя фотоґрафій ци інчых лаґровых материялів, як напр. засвідчыня про звільніня на свободу, котры могли бы дополнити інформациі в книжці, а котры быти може находят ся серед родинных памяток. З автором мож ся сконтактувати через сайт emisilo.pl.

Віктор Орбан стрітил ся з найвысшыма представниками грекокатолицкой церкви на Мадярах

В пятницю, 18. грудня/децембра, мадярскій премєр Віктор Орбан стрітил ся з найвысшыма представниками грекокатолицкой церкви на Мадярах, владыками: Філіпом Кочышом, Aтаназом Оросом і Авельом Сочком. Віктор Орбан принял єпископів в зреконструуваным історичным Кармелитаньскым Монастыри в Будапешті. Вчас неофіцийной бесіды выразил доцініня за труд грекокатолицкой церкви на Мадярах за роботу про родины, бідных люди і укріпляня комуніт. Церковны власти подякували за дотеперішню підпору з боку державы і за тото, же є можлива дальша спілпраца з представниками Мадяр. Єрархы подарували Орбанови Віфлеємскій Оген. Медже вірныма мультіетнічной грекокатолицкой церкви на Мадярях сут так само і Русины. В минулым році был для них одкрытый поломницкій Русиньскій Дім в Дебрецині фінансуваный мадярском владом. Попри Домі будувана є і русиньска деревяна церков.

Украіньскій Академік бесідує і о Русинах

Украіньскій історик і академік Нацийональной Академіі Наук Украіны Петро Толочко в ефірі телеканалу 112 Украіна коментувал сучасны діі на Украіні. Медже інчыма спомнул тіж на Русинів. Про русиньску меншыну спомнул в навязаню до коментуваня справы спору о храмы медже Украіньском Православном Церквю а Православном Церквю Украіны. Ствердил, што не може быти так, же коли комуси не любит ся мадярскій ци росийскій языкы, то остают заборонены, коли комуси не люблят ся Русины на Закарпатю, то боронит ся ім называти себе Русинами, так само як не мож собі взяти церкви, бо комуси ся так захотіло. Повіл, што влада є покликана на тото, жебы забезпечати комфортне жытя для каждого громадянина. Украіна то єдина держава, в котрій жыют Русины, яка дотепер не вызнає іх за окрему нацию і продолжат в украінізациі русиньского населіня.

Фот. emisilo.pl

Шеруй.

О авторі

Наталія Малецка-Новак

Хоц по школі інжынєр, то не тыкат ся роботы по тзв. фаху ;) Зато уж од вельо років доносит о вшыткым, што ся діє на Лемковині. І не лем. Штоденньо од 11.00 год. веде lifestyle'овый проґрам «Пачісна година» , а в суботы о 9.00 год. чытат для Вас порталь. Контакт: natalia@lem.fm

Коментарі