Сумар дня на 23. грудня/децембра 2025 р.

Приносиме вам сумар медияльной ґрупы ЛЕМ.фм+ на ден 23. грудня/децембра 2025 р.

Закінчыли ся ремонтовы роботы на дорогах в Мацині Великій і Рыхвалді

Закінчыли ся роботы звязаны з двома дороговыма проєктами, котры были реализуваны на обшыри ґміны Санкова. Іде о ремонт дорогы в Мацині Великій і Рыхвалді. Вартіст зреализуваного проєкту то понад 980 тис. зл. Ремонт проходил в рамках усуваня наслідств залив, котры пошкодили дорогы в ґорлицкым повіті в липци/юлию того рока. Інвестициі спілфінансуваны были з середків буджету державы, што были переказаны Міністерством Внутрішніх Справ і Адміністрациі та Міністерством Фінансів і Господаркы.

«Поза шляком» спацер з Рыманова до Сінявы 

Ґмінный Осередок Культуры в Рыманові та Стоваришыня PRZYRODOmaniacy просят то участи в природничым спацері з аніматорком пн. «Поза шляком». Прогулька зачне ся в Рыманові при Уряді Ґміны і закінчыт в Сіняві. Ціліст трасы то коло 15 км, а участникы по дорозі будут мати нагоду обзерати красу Низкого Бескіду. Обовязуют скоршы записы, кошт участи то символичных 5 злотых. Што важне, треба памятати о одповіднім облечыню і черевіках. Більше дрібниц находит ся на інтернетовым сайті Podkarpackie Travel.

«Формы присутности. Штука Лемків / Карпатскых Русинів»

«Формы присутности. Штука Лемків / Карпатскых Русинів» – так звучыт наголовок часовой выставы, яка презентувана буде од 17. січня/януара до 30. червця/юнія 2026 р. в Державным Етноґрафічным Музею в Варшаві. Єст то перша так шырока презентация артистичного доробку Лемків / Русинів, на котрій Енді Варголь, Епіфан Дровняк (Никыфор) і Юрий Новосільскій стрітят ся з артистками і артистами фунґуючыма дотля поза головным каноном. Експозиция обнимат шырокій ґеоґрафічный контекст – од Польщы, Словациі, Мадяр, через Чехы, Румунію, Украіну і Хорвацию, аж по діаспору в ЗША. Як подає орґанізатор выставы, Державный Етноґрафічный Музей, порушат она вельорічну тишу і вказує выключыня присутне в істориі інституцийонального приниманя штукы. Вказує, же спадковина Лемків / Карпатскых Русинів не вертат, але фурт тырват, мимо проб єй анулюваня і асиміляциі, як жывый елемент сучасной культуры. Куратором выставы єст др Михал Шымко, а серед медияльных патронів находят ся ЛЕМ.фм і Стоваришыня «Руска Бурса» в Ґорлицях.

Святочна стріча в Рускі Бурсі

Припоминаме, што уж в найблизшу суботу 27. грудня/децембра Стоваришыня «Руска Бурса» в Ґорлицях просит до участи в традицийній велийній стрічы. Для части буде то уж третій ден свят, а для некотрых – фурт іщы передсвяточный період. Без огляду на термін святкуваня – прошены сут вшыткы – ждати будут на вас клясичны смакы: кєселиця, грибы, горох, фізола, перогы. Перед гощыньом выступит Терочка, а пак просиме на спільне колядуваня. До бурсы мож приходити уж од рана в суботу 27. грудня/децембра, а выступ Терочкы і гостина заплянуваны сут на 16.00 год.

А на конец днешніх новин хочеме передати святочны желаня вшыткым тепер празднуючым. За григорияньскым календарьом заран выпадат ден велиі Рождества Христового, святкуваного окрем християн західньой традициі і вірныма дакотрых східніх Церкви. Зато вшыткым слухачам, любителям радия, котры святкуют Різдво уж тепер, желаме вшыткого доброго і смачной велиі при родинным столі. Желаня передає ансамбль медияльной ґрупы ЛЕМ.фм+ та члены Стоваришыня «Руска Бурса» в Ґорлицях. Христос ся Раждає!