Сумар дня на 23. листопада/новембра 2023 р.

Приносиме вам сумар медияльной ґрупы ЛЕМ.фм+ на ден 23. листопада/новембра 2023 р.

Парохія в Старым Волові святкувала свій ювілей

18. листопада/новембра свій ювілей істнуваня одсвяткувала єдна з лемківскых парохій на західніх землях Польщы. 70-літя празднували вірны православной парохіі св. Димитрия в Старым Волові (нижньошлезскє воєвідство). Парохію од самого початку творили вірны – выселены в рамах акциі «Вісла» з Лемковины. Святочному богослужыню проводил вроцлавско-щеціньскій владыка Юрий. Парохом є о. Александер Конахович. Xoц перше богослужыня в Старым Волові было одправлене 8. листопада/новембра 1952 р., то так по правді аж 13. листопада 1953 р. офіцияльно православны вірны отримали можніст хоснувати храм в Старым Волові. Парохію творили выселенці зо Снітниці, Мохначкы, Ждыні, Угрина, Вілой і Чорной Воды і Лоси. На волівску стацию в 1947 р. пришло десят транспортів з выгнаныма з Лемковины, в сумі близко 3 тис. осіб. Аж по 6 роках змогли почути наново свою молитву. Участ в святкуванях взяли запрошены гості, в тым римокатолицкій декан з Волова, а волівску Вязницю репрезентувал Лемко, майор Ваньо Борода. Владыка в тот ден нагородил найбарже заслуженых прихожан.

Пуищаня в Рускій Бурсі

Припоминаме, што можеме ся зыйти і кус поворожыти! Бо ци Лемкы ворожыли си на велию св. Андрия? На тото звіданя спрібуєме одповісти вчас неформальной стрічы в Рускій Бурсі в Ґорлицях, яка пройде в суботу 25. листопада/новембра. Стріча буде нагодом до забавы перед филипівком, а тоты, котрых обовязує уж різдвяный піст, стрічу можут портактувати як вечіркы, што традицийно проходили в осінньо-зимовым часі. «Вечіркы полнили важну товариску функцию і мимо тырваючого посту – розрывкову» – подают писаны джерела. Видиме ся в Рускій Бурсі в Ґорлицях уж в найблизшу суботу од 17.00 год. Буде тепла страва і музика.

Ден Копальників в Любіні

Вчера інформували сме, што ближыт ся Свято Копальників – праздник св. Варвары, а при тым, што каждорічно в православній парохіі св. Тройці в Любіні проходят святочны богослужыня. Знаный є уж проґрам тогорічных парохіяльных святкувань. Святочна літургія, яку очелит владыка Юрий, єпарха вроцлавско-щеціньскій, одбуде ся в любіньскым храмі 4. грудня/децембра о год. 8.30. В богослужыню возмут участ копальникы з Любіна і околиц, а тіж запрошены гості – представникы компаніі KGHM. Вельох копальників, якы роблят в майнах на обшыри Нижнього Шлеска, то Лемкы. Молитвы в тот ден будут вознешны за іх безпечну і успішну роботу. Праздник сходит ся зо святом Введіня во Храм Богородиці. На подію просит любіньска парохія враз з єй парохом, о. Богданом Репелом.

Споминова стріча присвячена бл. п. о. Данцакови

Окресна Бібліотека Давида Ґутґеселя в Бардийові і філия Централі Словацкой Християньской Інтеліґенциі в Бардийові в звязку з пятом річницчом смерти зорґанізували в середу 15. листопада/новембра споминову подію присвячену грекокатолицкому священникови, писательови, публицисті Франтишкови Данцакови. Участ в ній взял владыка Петро Руснак. Вчас подіі приближыли богате авторскє діло Данцака, за котре вчас жытя был нагородженый парома оцінінями, а серед них премійом Fra Angelica в 2017 р. Франтишек Данцак был окрем інчого членом Сполку Русиньскых Писателів Словациі, а занимал ся жытьом і творчістю русиньского романописателя Емілия Кубека.