Сумар дня на 23. серпня/авґуста 2024 р.

Приносиме вам сумар медияльной ґрупы ЛЕМ.фм+ на ден 23. серпня/авґуста 2024 р.

Спортовы змаганя в повітри над Креницьом

В Креници двадцетьох слeкляйнерів з краю і заграниці прібує побити рекорд Польщы, ідучы по завішеным в повітри мотузку. Над долином Чорного Потока был завішеный мотузок, по котрым од минулой середы до неділі 25. серпня/авґуста будут проходити слекляйнеры з цілой державы. Має він 2,5 цм шырокости і аж пілтора кілометра долгости. Актуальный рекорд Польщы то 870 м долгости. Мотузок лучыт видокову вежу на Солотвинах з вершком Креницкой Яворины. В найвысшым місци вісит близко 250 метрів над земльом. Спортовці будут забезпечены специяльныма лонжами, котры будут хоронити перед одпадіньом з мотузка при евентуальній страті рівновагы. Обзерати видовиско може каждый. Змаганя проходят каждый ден в годинах од 10.00 до 19.00. То єднак не вшытко. В суботу і неділю на Солотвинах не бракне додатковых атракций – замонтуваны будут коротшы, близко 50-метровы тасьмы, на котрых буде проходил Чемпіонат Польщы Speedline, а окрем того мож буде обзерати показы акробаций на мотузку.

В Навойовій одбудовуют популяцию загороженого ґатунку птахів

Неодолга в Сандецкым Бескіді замешкают новы глухарі. То лісновы птахы зближены велькістю до індика. Перед роками были натуральныма жытелями тых земель, пак зникнули під пресийом драпіжників. Тепер ґатукок находит ся під стислом охороном, в цілій Польщы єст критично загороженый загыбніньом. Надлісництво Навойова од 2010 р. намагат ся одбудувати популяцию тых птахів. За тот час ввели до ліса понад 300 глухарів. Тепер лісникы позыскали 15 молодых птахів, котры внет замешкают в пасмі Креницкой Яворины. Як подал Войцєх Кужея, надлісничый Надлісництва Навойова, телеметричны даны вказуют, што вводжены нима птахы засиляют тіж популяциі в сусідніх пасмах, вандруючы м.ін. в Низкій Бескід ци на Словацию.

В Мушыні одкрыют вежу таємниц

В будучым році на замку в Мушыні одкрыют «вежу таємниц», де будут презентуван мультімедияльны персоны. Як подал бургомайстер Мушыны Ян Ґольба, на замку буде мож видіти особы, котры колиси жыли, як і тоты фікцийны. Іде предовшыткым о тото, жебы гості курорту, туристы, жытелі, могли ся стрітити з богатом історийом Мушыны – з леґендами, баснями, але і тыма, котры колиси жыли, або леґендарныма персонами. Завдякы схоснуваню нового технолоґічного систему буде мож створити вражыня, же тоты особы нахосят ся коло нас. Середкы на вежу таємниц повело ся отримати з проґраму Interreg. Кошт інвестициі то 6,5 млн злотых.

Дни Деревяной Архітекруты 2024

Припоминаме, што од днес до найблизшой неділі в цілій Польщы святкуваны будут Дни Деревяной Архітекруты 2024. Подіі в Малопольщы орґанізуваны будут в девятьох місцях. Головны атракциі проходят днес од рана в Каштели в Шымбарку. Єдном з них сут етноґрафічно-моделярскы варштаты «Акция транслокация», де участникы дознают ся, як колиси будували лемківскы села, як выглядала хыжа на селі і ци мож перенести хыжу зо собом. Додатково мож буде звидіти Скансен в Шымбарку, зреконструувану церков в Ґладышові ци грекокатолицку церков в Бортным. Ціліст проґраму дополнят «отворены двері» в обєктах Деревяной Архітектуры – в рамках акциі каждого дня мож буде звидіти обєкты, котры не сут наштоден удоступняны туристам. Вступ на кажду з атракций єст дармовый. Полный проґрам находит ся на сайті Нацийонального Інституту Культуры.