Сумар дня на 24. червця/юнія 2025 р.

Приносиме вам сумар медияльной ґрупы ЛЕМ.фм+ на ден 24. червця/юнія 2025 р.

«Доля церкви на Лемковині»

Стоваришыня Руска Бурса в Ґорлицях просит на популярнонауковый выклад на тему долі церкви на Лемковині. Прелекцию выголосит історик і реґіоналиста Даміян Новак, адюнкт в Музею Бічской Землі в Бічы. Выклад посвяченый буде анализі культурных і архітектонных явиск, што детермінували еволюцию церковного будівництва на обшыри Лемковины. На основі сакральных обєктів омовлены будут ріжнорідны тенденциі формотворчых i трансформацийных процесів кінця ХІХ в. аж по деструкцийны діяня другой половины столітя, з особливым підкрислиньом змін в культуровым краєвиді, котры в тым часі проходили. Наррация вкаже церкви не лем як творы архітектуры, але і як носителів памяти. Выклад ілюструваный буде богатым візуальным материялом, котрый вкаже зміны архітектонных форм, а тіж змінніст іх культурного контексту. Прелекция пройде в четвер 17. липця/юлия о год. 18.00 в Рускі Бурсі в Ґорлицях.

«Вечер в загорідці» – одпочынок в природі

Маґурскій Нацийональный Парк просит до участи в природничій подіі «Вечер в загорідці». В проґрамі акциі сут так атракциі для діти, як і для дорослых участників. Подія зачне ся о 17.00 год. од сенсоричного купаня в загороді Едукацийного Осередка в Крампній, а в дальшій части присутны будут мочы взяти участ в «лісовым мытю». Тота част проґраму перезнчена єст лем для дорослых. В тым самым часі наймолодшы будут мочы послухати оповідань о пущы та взяти участ в варштатх робліня віночків. Подія закінчыт ся спільном ватром. Як підкрисляют орґанізаторы, то вынятковый час в році, в котрым вартат досвідчати природы в цілій єй красі.

Яслиска зас будут культуровом столицьом Низкого Бескіду

В найблизшый четвер 26. червця/юнія в Яслисках зачне ся «Червец в Яслисках. Мінілітературный фестіваль в Низкым Бескіді». Подія буде тырвала штырі дни, а в проґрамі находят ся ріжного рода выставы, прелекциі і много інчых атракциій. То нагода не лем до послуханя поезиі, але тіж до близшого познаня літературы і штукы XXI в. серед веььох ціненых артистів, з Польщы і заграниці. Заплянуваны дискусиі тыкают м.ін. вельоязычности в літературі ци модерной штукы і єй вплияня на сучасне соспільство. Подія пройде в барі «Черемха», вступ дармо. Додатково припоминаме, што в серпни/авґусті в Яслисках пройде шторічный фільмовый фестіваль «Крутят ня Яслиска».

Ґміна Крампна реалізує новый проєкт

В Крампній закінчыли роботы при очыщаню резервуару на ріці Вислока. Усуніня осадів з дна то початок для більшого проєкту, котрого цілю єст одкрыти рекреацийну простір в оточыню Маґурского Нацийонального Парку. В планях єст утворити плажы і выпочынкову стрефу при сусідніх басенах. Цілю нового проєкту єст піднесіня естетикы, што має переложыти ся на більшу туристичну атракцийніст. Кошт реализациі першого етапу робіт то близко мілийон злотых. По закінчыню стабілизациі терену зачнут ся роботы звязаны з просторным заґаздуваньом.