Сумар дня на 24. квітня/апріля 2025 р.

Приносиме вам сумар медияльной ґрупы ЛЕМ.фм+ на ден 24. квітня/апріля 2025 р.

Світ высловлює спілчутя з приводу смерти Папы римского

«Святійшый Отец Франциск был Папом милосердя. Был людскій, скромный і мал велику тугу по мирі» – в социяльній сіти Facebook то написал Высокопреосвященный Йона Максим, пряшівскій грекокатолицкій архієпископ і митрополита. Владыка вызвал молити ся за Папу Франциска, котрый вмер в понедільок в ранных годинах. За його словами был Папом милосердя. «Доказом того был, і коротко по зачатку його понтифікату, выголошеный вынятковый рік милосердя», написал митрополита з тым, же священникам і єпископам все акцентувал важніст того, жебы одпущати, помилувати грішных і быти місийонарями милосердя. Щыре спілчутя братям і сестрам з римокатолицкой і грекокатолицкой Церкви высловили і православны владыкы з цілого світа, в тым представникы помісных православных Церкви. Похорон Папы Франциска буде в суботу о 10.00 год. На нашым портали чытайте статю о звязках Папы з вірныма русиньской грекокатолицкой традициі.

Посвячыня крестів на бані новобудуваной церкви на Яворі

В другій ден Великодня, з благословліня архієпископа Паісия, владыкы перемышльско-ґорлицкого, в высівскій парохіяльній церкви была одслужена пасхальна вечырня, вчас котрой владыка посвятил пят крестів, якы звінчат бані новобудуваной православной церкви на Святій Горі Явір. В церкви молили ся священникы і вірны креницкого і ґорлицкого деканатів. В проповіди архієпископ Паісий припомнул, што будуваный храм буде памятником трьох ювілеів: 100-літя Автокефалиі ПАПЦ, обявліня Богородиці на Горі Явір і повороту Лемків до віры вітців – православя. Хто з Вас має дяку – може спомочы будову черeз посыланя датків.

«Бесіда» – уж для Вас

Доступный є дальшый номер часопису Стоваришыня Лемків «Бесіда», ч. 2 (203) за місяці марец/квітен 2025 р. В номері прочытаме м.ін. статі Наталиі Малецкой-Новак о габілітациі Фомы Квокы та о тым, што проф. Олена Дуць-Файфер стала новом ведучом Східньоевропейской Комісиі Польской Академіі Знань. Є тіж допис о тым, што вышли лемківскы малюванкы для діти. Петро Медвідь пише о 30-літю кодифікациі русиньского языка. Є і реляция Северияна Косовского зо святкуваня 20-літя меншынового закону в Соймі Польской Республикы. Петро Мурянка публикує выімок по лемківскы з книжкы «А Вісла дальше плыне» тыкаючый Великодня. Сут тіж річницьовы статі о Гіадорі Стрипскым, Модесті Менціньскым і Штефані Шкымбі. Заохочаме чытати.

Ґуральска меншына на Словациі має свого представника

В Палаті Нацийональных Меншын, котра є частьом Рады Влады Словацкой Республикы про нацийональны меншыны, буде мала єдного представника і ґуральска нацийональна меншына. Выходит то зо зміны і дополніня статуту Рады, котры в середу 23. квітня/апріля 2025 р. схвалила словацка влада. Сам факт, што ґуральска меншына буде мала свого репрезентанта выникат з того, што на Словациі в січни/януарі вызнано ґуральску меншыну за нацийональну меншыну. Припоминаме, же Рада Влады як окремый порадный орґан владного ґабінету выникнул дефінітивно схваліньом єй статуту на кінци жолтня/октобра 2024 р. Рада навязує до роботы Выбору (т.є. попереднього орґану), полнит функцию консультацийного орґану. Мадяры мают в даній раді сім членів. Ромы мают штырьох, Русины трьох, Украінці і Чехы по двоє членів, решта меншын має по єдным представику.