Сумар дня на 24. серпня/авґуста 2026 р.

Приносиме вам сумар медияльной ґрупы ЛЕМ.фм+ на ден 24. серпня/авґуста 2026 р.

Одкрытя по модернізациі Музею Модерной Штукы Енді Варголя в Меджелабірцях

Уж неодолга пройде торжественне одкрытя Музею Модерной Штукы Енді Варголя в Меджелабірцях. Припомнийме, што Музей Модерной Штукы Енді Варголя в Меджелабірцях, єден з двох музеів Варголя на світі і єдиный в Европі, є од марця 2023 р. запертый – переходил в тым часі велику реконструкцию. Музей єст уж змодернізуваный і перебудуваный згідно з первістныма плянами і візиями. Нашли ся там новы експозицийно-едукацийны просторы, амфітеатр ци зелены елементы, такы як зелена стріха. Модернізуваны были так само технолоґіі, в тым систем безпекы. Подія одкрытя музею по модернізациі пройде в пятницю 4. вересня/септембра в год. од 9.00 до 16.00. В рамках музичной части запрезентуют ся: Катаріна Кошчова, Домініка Новотна і AMC Trio та Комайота. Будут і додатковы атракциі, такы як варштаты сітодруку. В годинах тырваня подіі будут тіж індивідуальны прогулькы по музею. Цінник вступного найдете на фейсбуковым сайті Музею. Окрем того в остатніх днях Музей оголосил, што хоче пошырити свою екіпу і глядат новых спілпрацівників. Полный спис оферт найдете на інтернетовым сайті Музею.

Торжества в ден памяти священномученика Максима Ґорлицкого

Православна парохія св. Тройці в Ґорлицях просит до участи в торжественных богослужынях з нагоды дня памяти священномученика Максима Ґорлицкого, што будут проходити в катедральній церкви в Ґорлицях в днях 5. і 6. вересня/септембра. Традицийні, уж 9. раз, в передден свята, тє. в суботу 5. вересня/септембра, одбуде ся піше поломництво зо Ждыні до Ґорлиц, на свято покровителя перемышльско-ґорлицкой єпархіі. Поломництво зачне ся рано о 5.00 год св. Літургійом в церкви Покровы Пресвятой Богородиці в Ждыни, де хрещеный был св. Максим. Пак поломникы підут через Ждыню, Ґладышів, Маластівску Маґуру, Рыхвалд, Сяры і Ґорлиці. Участ в поломництві мож зголосити до 2. вересня/септембра. В переден свята о 17.00 год. в ґорлицкій катедрі буде правлена всеночна. В ден свята – неділю 6. вересня/септембра, перша Літургія буде служена о 6.00 рано, пак о 8.30 чытаный буде акафист перед мощами св. Максима. О год. 9.45 привитаны будут прибывшы єрархы, а о 10.00 год. зачне ся головна св. Літургія.

«Łemkowie, opowieść w skrawkach» – стріча в Варшаві і Пшемкові

В минулу пятницю в Варшаві прошла стріча в варштатово-выкладовій формі: «Łemkowie, opowieść w skrawkach», яку вели Оксана Ґрабан-Ліхтаньска і Данько Горощак. Была то перша стріча з циклю – друга одбуде ся онедолга на Нижнім Шлезску. Подія пройде в Пшемківскым Осередку Культуры в пятницю 4. вересня/септембра. В проґрамі прелекция о лемківскій культурі, лекция лемківского языка та наука лемківскых пісен і танця. Початок о 17.00 год.

«Юрий Новосільскій – як герой і жертва попкультуры» – выклад в Левкові

В суботу 19. вересня/септембра в Бальовій Сали Палацу Липиньскых в Музею в Левкові буде мож выслухати выклад пн. «Юрий Новосільскій – як герой і жертва попкультуры». Выклад выголосит др Кристина Черні. Вступне на подію дармо, обовязує резервация безплатных білетів. То єдна з подій товаришучых выставі пн. «Містериюм штоденности», на котрій мож видіти 23 творы Юрия Новосільского. Выстава обнимат шырокiй перегляд його доробку – од сакрального малярства по абстракцию. Выстава буде презентувана на терені Палацово-Паркового Комплексу в Левкові до 16. жолтня/октобра тр.