Сумар дня на 25. листопада/новембра 2022 р.

Приносиме вам сумар медияльной ґрупы ЛЕМ.фм+ на ден 25. листопада/новембра 2022 р.

Комунікат меншыновой стороны Спільной Комісиі Уряду та Нацийональных і Етнічных Меншын

Меншынова сторона Спільной Комісиі Уряду та Нацийональных і Етнічных Меншын выдала комунікат, в котрым інформує о рішыню завершыти стан завішыня меншыновой стороны в працах Комісиі. Члены СКУтНіЕМ будучы представниками нацийональных і етнічных меншын та соспільности хоснуючых реґіонлаьный язык завісили свою участ в працах Комісиі 1. червця/юнія тр., протестуючы проти введіню переписів дискримінуючых німецку меншыну в квестиі вчыня меншынового языка і браку діянь, якы бы змінили тоту ситуацию зо стороны уряду. Як пишут в комунікаті, надіяли ся, же так драматичный ґест з іх стороны спричынит рефлексиі над правном дискримінацийом німецкой меншыны і зміну того стану. Дотля єднак такы діяня з урядовой стороны не были підняты. Зато же діяня меншыновой стороны Комісиі не выкликали практичных результатів, рефлексий і не видно реальной перспективы зміны, рішыли они завершыти свій стан завішыня в працах Комісиі. Оціняют то як поражку не лем меншыновой стороны, але і цілой Комісиі. Незмінно уважают, што переписы дискриміуючы німецку меншыну так само нарушают фундаменты політикы державы взглядом нацийональных і етнічных меншын, яка реализувана єст в Польщы од 1989 р.

Рапорт Greenpeace: «Карпатскій Ліс: Загорожена Дідовизна»

Як подало Greenpeace в рапорті «Карпатскій Ліс: Загорожена Дідовизна», што годину в Карпатах зникат ліс велькости пятьох футбольовых боіск, як результат неодповідального лісового ґаздуваня. В рапорті орґанізация анализує сателітарны даны з лісів Карпат – другого, як іде о велькіст, гірского масиву в Европі, што іде од Австриі і Чех через Польщу, Словацию, Мадяры, Украіну по Румунію і Сербію. Лем ок. 3% з них єст під стислом охороном. Ситуация фурт ся погіршат. Подля рапорту, як результат діяльности чловека, обшыр лісів в Карпатах зменшыл ся через остатніх 20 років о 7350 км2, тє. 4 га на годину. В Польщы лісова покрыва зменшыла ся о близко 350 км2, значыт менше-більше о обшыр Кракова. В 2020 р. з 13 надлісництв обнимаючых Карпатскій Ліс штоденно выізджало по 80 тяжкых авт з вытятыма деревами, часто о памятниковых розмірах. Лісны дорогы будуваны в тій ціли спричыняют ерозию ґлебы, звекшают ризико залив і неґативно влияют на натуральны сідлиска карпатской звірины. Greenpeace звертат ся з апельом до Европейской Комісиі і державных власти пильно основати новый, медженародный проґрам охороны Карпат, хосенный для природы і локальных соспільности.

Крениця фурт реализує спортовы інвестициі

Зачала ся будова тору до паралельной ізды і двох памп-траків на Парковій Горі. Будут они схоснуваны в змаганях МТБ в рамках ІІІ Европейскых Ігр Краків – Малопольща 2023. Окрем того на Парковій Горі пройдут змаганя в гірскых бігах. Тырват тіж ґрунтовный ремонт Ледовой Галі, в якій пройдут змаганя в джудо і теквондо. Европейскы Ігры проходити будут в терміні од 21. червця/юнія до 2. липця/юлия будучого рока. На перебудову, ремонты і будову спортовых обєктів вплыне до Крениці понад 20 млн злотых.

Мушына плянує екоінвестициі

Ґміна буде отепляла школы, выміняла пецы і купит електричны автобусы. Поможут в тым дофінансуваня з Нацийонального Фонфу Охороны Середовиска і Водной Господаркы. Перша екоінвестиция тыкат выміны отепліня і освітліня будинків предшколя і основной школы в Поворознику на модерне і еколоґічне. Другій проєкт тыкат публичной комунікациі. Ґміна плянує купити пят автобусів на електричну енерґію, три з ок. 70 місцями для пасажерів і два з ок. 22 місцями, як і стациі ладуваня для двох поіздів. Інвестициі мают быти завершены в марци 2024 рока. Цілковитый кошт обох проєктів то понад 17,3 млн злотых.