Сумар дня на 25. вересня/септембра 2023 р.

Приносиме вам сумар медияльной ґрупы ЛЕМ.фм+ на ден 25. вересня/септембра 2023 р.

Вмер русиньскій вчены Людвіґ Філіп

Як інформовали підкарпатскы русиньскы орґанізациі, в четвер 21. вересня/септембра перестало бити серце русиньского історика, краєзнателя і честного председы Ужгородского Культурно-Освітнього Общества імени Александра Духновича Людвіґа Філіпа. Родил ся він в 1943 р. в Ужгороді, коли територия была під мадярском окупацийом. Ціле жытя был звязаный з рідным містом, долгы рокы робил в Закарпатскым Областным Краєзнавчым Музею в Ужгороді. Од 1990 рока активно влучыл ся до русиньского возродного руху на Підкарпатю. Людвіґ Філіп быв автором понад 500 публикаций о істориі Ужгорода і Підкарпатя, діячах культуры той обшыри ци істориі Мукачівской Грекокатолицкой Єпархіі. Был участником многых медженародных науковых конференций. Його плідна робота была вельораз нагороджувана. Веце про жытя і доробок Людвіґа Філіпа прочытате в дописі на нашым портали.

Мушына розбудує автобусову комунікацию

Мушына купит пят електичных автобусів. Мают они передовшыткым довозити діти до школы, а в дальшій черзі служыти жытелям і туристам. Новы автобусы будут коштувати понад 10 млн злотых. Ґміна має тіж отримати понад 5 млн злотых, завдякы котрым купит шіст низкоемісийных автобусів, што мали бы курсувати медже Мушыном і Креницьом.

ХІІІ Лемківскій Вечер в Коросні

Уж в тоту пятницю, 29. вересня/септембра пройде ХІІІ Лемківскій Вечер в Коросні. Лемківскы Вечеры то ініциятива Анны Романьчак і Пшемка Поляньского, котры орґанізуют іх од 2004 р. Дотля на гостинах выступували м.ін. ґрупа А Де То Давнійше Строіло, Замішанці ци Капеля Спід Рубані. Тым разом запрезентує ся капеля Древутня, котра має в своім репертуарі і лемківску, русиньску музику. Концерты товаришучы Лемківскым Вечерам найчастійше переходят в спільне музикуваня і танцюваня. Подія одбуде ся в Парковій Реставрациі в Коросні. Вступне 30 зл. Обовязує резервация місц. Дрібниці найдете в статі на нашым портали.

Тырвают акциі вакцинациі лишок

Припоминаме, што Воєвідскы Лікарі Ветеринарі поінформували в комунікатах о акциях вакцинациі свобідно жыючых лишок проти встеклині. В підкарпатскым воєвідстві акция зачала ся в четвер 21. вересня/септембра, а в малопольскым воєвідстві два дни пізнійше, в суботу 23. вересня/септембра. Обі акциі потрырвают до віторка 3. жолтня/октобра. Вакцина буде метана з аероплянів і выкладана ручні, має форму бронзового диску, з притігаючым звірята запахом. Треба памятати, же кєд найдеме таку вакцину не мож єй дотыкати. В часі тырваня акциі вакцинациі лишок і через 14 дни по єй завершыню, тє. до 17. жолтня/октобра включно, не мож выпущати без опікы псів і котів, а в часі прогульок псы мусят быти на мотузку і в наморднику. Комунікаты находят ся на офіцияльных інтернетовых сайтах воєвідскых інспекторатів ветеринариі.