Сумар дня на 26. червця/юнія 2025 р.

Приносиме вам сумар медияльной ґрупы ЛЕМ.фм+ на ден 26. червця/юнія 2025 р.

Заран зачынат ся «Світ під Кычером»

Уж заран зачне ся 28. едиция Медженародного Фольклористичного Фестівалю «Світ під Кычером». Тогорічна едиция, слідом попередніх років, одбуде ся выключні на західніх землях. Концерт одкрытя буде в Ліґницкым Поли. В наступных днях короводы і концерты будут в Олесници, Лісци, Ліґници, Поляници, Рудній, Польковицях і в Шпротаві. Фіналовый концерт пройде 6. липця/юлия в Ліґници. Вчас тогорічной едициі презентувати будут ся ансамблі з Арґентины, Пілнічной Македоніі, Ґвінеі, Портуґалиі, Костарикы, Украіны, Косова і Канады. З лемківском спадковином запрезентує ся ґазда – ансамбль Кычера. Дві попередні едициі фестівалю (з 2022 і 2023 років) Медженародна Федерация Фестівалів FIDAF узнала за єдны зо штырьох найліпшых на світі. Меценатами фестівалю сут: Міністерство Культуры і Нацийональной Спадковины, Міністерство Внутрішніх Справ і Адміністрациі, Фундация KGHM та Нижньошлезскє Воєвідство. Головным орґанізатором фестівалю єст Лемківскій Ансамбль Пісні і Танця Кычера.

Ремонт мосту на пути Санкова – Розділя

Як інформує Ґміна Санкова, в звязку з розобраньом і будовом нового мосту на повітовым пути но.1498K Санкова – Розділя, од 30. червця/юнія од 7:00 год. рано дорога тота буде часово закрыта. Плянуваный час ограничынь є аж до кінця листопада/новембра тр. Буде пару можливых обіздів: через воєвідску дорогу но. 977 (Тарнів – Ґорлиці – Конечна), повітову 1498K (Санкова – Домініковиці) і воєвідском дорогом но. 933 (Ґорлиці – Дукля) через Домініковиці, Криґ, Липинкы і Розділя. Перевидувана долгіст обізду то блихко 12 км.

Не підете часово з Баниці до Ізб

A на Лемковині є в тым часі іщы єден ремонт мосту. Як інформує Ґміна Устя Рускє, од вчера, тє. од 25. червця/юнія, в звязку з початком ремонтовых робіт, буде закрытый міст на ґмінній дорозі Баниця–Ізбы. Передвидуваный час тырваня ремонту то близко 5 тыжнів. В тым часі переізд тым путьом буде часово неможливый. Доізд до Ізб буде можливый обіздом – повітовом дорогом Фльоринка–Ізбы.

О тыжден в суботу спомнеме бл. п. Богдана Ґамбаля

2. липця/юлия выпадат 5. річниця смерти бл. п. Богдана Ґамбаля, выдатного лемківского діяча, єдного з основателів одновленой ґорлицкой Руской Бурсы і думкодавці першого лемківского радия ЛЕМ.фм. З той причыны хочеме запросити вас на дві стрічы, якы будут присвячены його памяти. В суботу, 5. липця/юлия о 11:30 стрітиме ся на богослужыню на Святій Горі Явір, якє буде правлене в місцевій каплици. Пак, о 14:30 просиме вшыткых на споминову стрічу до Руской Бурсы в Ґорлицях, де будеме споминати спільны моменты з Покійным Богданом Ґамбальом. Хочеме вернути ся до його думок, діяня і присутности – не лем як до споминів, але як точкы однесіня для того, што є днес.