Сумар дня на 26. мая 2021 р.

Приносиме вам сумар медияльной ґрупы ЛЕМ.фм+ на ден 26 мая 2021 р.

Засідала Комісия про Нацийональны Меншыны і Етнічны Ґрупы Рады Влады Словацкой Республикы

В минулый понедільок проходило 41. засіданя Комісиі про Нацийональны Меншыны і Етнічны Ґрупы Рады Влады Словацкой Республикы, фурт іщы в онляйновій формі. Бесідували о нацийональных музеях, іх діяльности в минулым році, шкільництві в часі пандеміі ци приправах тыкаючых нацийонального закону – робоча ґрупа, котру покликал полномічный влады Ласло Буковскій, фурт выпрацовує одповідні записы будучой уставы. На засіданю підниманы были і дальшы темы. Комісия была інформувана о змінах Фонду на Підпору Культуры Нацийональных Меншын, якы хоче приняти парлямент. По новелизациі до оцінюючых рад могли бы ся голосити лем меншыновы зареґіструваны орґанізациі, з вылучыньом напр. приватных фірм, як то было дотепер. Інчом пропонуваном зміном є, жебы Фонд обнимал підпором, окрем меншын, зневыгоднены ґрупы. Комісия критичні ся ґу тому односит, што высловила в принятым узнесіню зо свойом неґативном позицийом в тій справі. На засіданю дискутували так само заклик Комітету Фаховців Рады Европы про звекшыня заанґажуваня словацкой державы в діяня на благо реґіональных і меншыновых языків. Дальше засіданя Комісиі пройде аж в вересни/септембрі тр.

Посвятили дзвоны

В неділю, 23. мая, в селі Зубне, гуменьского окресу, при участи пряшівского грекокатолицкого архієпископа і митрополиты Йоана Бабяка і гуменьского архієпархіяльного вікария Мартіна Злацкого одбыл ся одпуст на праздник Сошествія Святого Духа – Зелены Свята. Торжество было повязане з посвячыньом двох новых дзвонів – великого з меном Михайло, котрый пукнул осіню 2020 рока, зато был наново зрыхтуваный, і другого меншого, котрый має мено Святый Дух. Тот вірны дали зробити з нагоды 250. річниці храму, котра буде проходила в 2024. Зо взгляду на пандемію посвячыня і торжественна літургія одбыли ся на містным амфітеатрі. Участ брало великє чысло місцевых вірных та з близкой околиці. Інформувал о тым Іван Барна, містный парох.

Ерделий в себе

Од вчера в Закарпатскым Областным Артистичным Музею ім. Йосифа Бокшая в Ужгороді одкрыта є експозиция творів Адальберта Ерделия – русиньского маляря, педаґоґа, культурного діяча на Підкарпатскій Руси. Выстава зорґанізувана є в 130. річницю народжыня артисты, якій вєдно з Бокшайом были основателями підкарпатской малярской школы. Ерделий был постімпресийоністом, мастером портрету. Пару років жыл в Парижы. Творы Ерделия іщы за його жытя вказуваны были в вельох европейскых метрополиях – в Римі, Парижы, Венециі, Неаполи, Міляні, Бруксели, во Відни, Варшаві ци Будапешті. Адальберт Ерделий жыл в роках 1891-1955. Вмер в Ужгороді. Выставу буде мож видіти до 15. червця/юнія.

Триптих од Мирославы Копинец

Перед місяцьом, 27. квітня/апріля, в просторах Закарпатского Областного Музею Народной Архітектуры і Бываня в Ужгороді был презентуваный новый кліп народной пісні «Під дубиною» співаной популярном етно-фольк вокалистком Мирославом Шып (псевд. Мирослава Копинец). Кліп был зробленый во спілпрацы зо знаным режысером Дмитром Фесенком. Так само были представлены і дві попередні роботы артистів («Не спала я сиї ночі», «Тріє царіє»). Камерменом вшыткых трьох кліпів є Тимофій Шмайда. Артистка пояснила, што всітри відеокліпы треба брати за ціліст, а мож іх видіти м.ін. в сервісі YouTube.