Сумар дня на 26. мая 2026 р.

Приносиме вам сумар медияльной ґрупы ЛЕМ.фм+ на ден 26. мая 2026 р.

Потягы за злотiвку i поворот потягу «Włóczykij»

Малопольща ставлят на желiзничный транспорт i заохочат жытелiв реґіону до родинных екскурсий перед вакациями. З нагоды Дня Дiтины i долгого вiкенду на початку червця/юнія самоуряд приготовил специяльны промоциi на реґiональны переiзды – дiти i молоджава поiхают потягами за символичну злотiвку, а родины зможут схоснувати туньшы ґруповы білеты.

Оферта «Малопольскiй білет на Ден Дiтины» буде обовязувала 30. i 31. мая. За злотiвку дiти i молодіж будут мочы цiлый ден, без ограничыня iздити потягами орґанiзуваныма Малопольскым Воєвідством, значыт Малопольском Желізницьом, POLREGIO i Шлезском Желізницьом. Промоция обнимат м.iн. трасы з Кракова до Катовиц ци в сторону Підгаля, але без одтинка Мушына – Попрад – Татры.

Од 4. до 7. червця/юнія буде дiял «Малопольскiй білет для родины», котрый можут хоснувати ґрупы од двох до шестьох осiб, мiнiмальнi з єдном дiтином. Тота акция мат заохотити люди подорожувати публичным транспортом в місце авта в часі долгого вiкенду початком червця/юнія.

Додатковом атракцийом тогорічнього лiтнього сезону буде поворот потягу «Włóczykij», якiй зас получыт Ясло з Креницьом. Ленiя стартує кiнцьом червця/юнія i так як попереднi оферты мат кликати люди до частiйшой туристикы, а при тым хоснуваня еколоґiчного желiзничного транспорту, в якiй сильно iнвестує Малопольща.

Будова православной церкви в Краковi

При улици Вiослярскiй в Краковi выбудувана буде нова православна церков – друга в місті і перша, што была запроєктувана од початку як православный храм. 24. мая одбыла ся подiя вмуруваня угольного каменя під будову святыні, котра мат помістити парусот вірных. Нова церков буде належала до православной парохіi Успіня Пресвятой Богородиці, котра днес діє при улици Шпытальній. Од років підкрисляно, же теперішній храм є за малый для штораз більшого чысла вірных, головно підчас найбільшых свят. Церков возникат на пляні грецкого креста і буде носила імя святых Кірила і Методия. Торжество очелил православный єпископ лодзіньско-познаньскій Атаназий. Участ брали тіж парох краківской православной парохіi о. митрат Ярослав Антосюк i iншы представникы православной Церкви та краківскій митрополита кардинал Ґжеґож Рись.

«Таінство штоденности» – выстава штукы Юрия Новосiльского

В музею в Левкові коло Острова Великопольского 23. мая одбыл ся вернісаж выставы посвяченой творчости Юрия Новосiльского. Експозиция пн. «Таінство штоденности» представлят 23 творы артисты, в тым малюнкы, іконы выпожычены з найважнійшых польскых музейных інституций і приватных збірок. Выстава была приготовлена з нагоды 15. річниці смерти маляря і обнимат шырокiй перегляд його доробку – од сакрального малярства по абстракцию. Експозициі товаришыт богатый проґрам едукацийных подій, влучнi з малярскыма варштатами і писаня ікон, кураторскыма опроваджынями і стрічами з експертами. Выстава буде доступна до 16. жолтня/октобра того рока.

Тыжден русиньскотематичных подій

Тот тыжден полный є русиньскотематичных подій, о котрых при нагодi припоминаме.

Вчера, 25. мая, зачал ся 14. Русиньскiй Фестiваль в Свиднику. Подiя буде тырвала цiлый тыжден, аж до 31. мая.

В Державным Етноґрафічным Музею в Варшаві продолжаный єст цикль подій приготовленых в рамках выставы «Формы присутности. Штука Лемкiв/Карпатскых Русинiв». 28. мая одбуде ся стрiча «В хыжы і на чужыні». Буде то опроваджыня посвячене темі міґрациі і досвіду бытя поза рідным крайом. Стріча зосереджат ся на рефлексиі о тым, як традиция функцийонує в діаспорі і як змінят ся культурова достоменнiст поза рідным середовиском.

Кульмінацийным пунктом тыжня буде вiкенд 30.–31. мая, коли то одбуде ся 61. едиция Фестівалю Культуры Русинів в Камюнцi.