Сумар дня на 26. серпня/авґуста 2026 р.

Приносиме вам сумар медияльной ґрупы ЛЕМ.фм+ на ден 26. серпня/авґуста 2026 р.

В Ужгороді буде вельокультурово, але без автохтонів – Русинів

Як поінформувал Закарпатскiй Музей Народной Архітектуры і Бываня в Ужгороді – кінцьом серпня/авґуста, в своіх просторах орґанізує науково-практичну конференцию пн. «Етнічна палета Закарпатя: істория, культурна дідовизна і музейна репрезентация». Орґанізаторы заповідают дебату о історичній памяти, достоменности і вельокультуровости реґіону – єднак самы поминяют присутніст Русинів. В проґрамі нашли ся выступліня посвячены м.ін. угорскій, словацкій, жыдівскій ци румуньскій соспільности. Бракує тем, котры бы тыкали Русинів, якы столітями спілтворили і спілтворят історию Підкарпатя. Помияня Русинів підчас подіі, котра посвячена є вельокультуровости, фальшує образ історичной спадковины Закарпатя. Чудує то тым барже, же од 2007 рока, на основі рішыня Закарпатской Областной Рады Русины на териториі Закарпатской Области Украіны сут вызнаны як окрема народніст. Описувана подія то не першый примір іґноруваня русиньской меншыны. В 2023 р. Закарпатска Областна Воєньска Адміністрация інформувала, же Закарпатска Област стала першым реґіоном Украіны, де прошли консультациі з представниками нацийональных меншын. Наша редакция выслала звіданя, чом нихто не запросил РУсинів на речены консультациі. Дотепер ждеме на одповід.

Вернигора в Квятони – зачынат ся фестіваль «Музика Заклята в Деревi»

Уж днес стартує фестіваль «Музика Заклята в Деревi», в рамках котрого концерты проходят в забытковых деревяных обєктах Низкого і Сандецкого Бескідів. Днес о 19.00 год. зачне ся першый концерт – ансамбль Вернигора, якій выконує бойківску музику, выступит в церкви в Квятони. В проґрамі дальшых концертів нашли ся артисты, якы репрезентуют ріжны музичны жанры – од музикы інспіруваной традицийом Карпат і фольклором по сучасну альтернативну музику і поп. Выступлят іщы м.ін. Войтек Шуманьскiй, Туля і VOŁOSI. В Мазярскій Загороді в Лоси выступит Дія, котра лучыт традицийный фольклор з модерном музиком. Подіі товаришыти будут тіж варштаты ремесла, презентациі реґіональных страв, деґустациі локальных продуктів і зiля. Кажда з подій має быти нагодом, жебы познати выняткове дідицттво Шляку Деревяной Архітектуры в Малопольщы. Вшыткы концерты сут безплатны.

Підпертя од музейників для скансену в Саноку

Стоваришыня Музеів під Одкрытым Небом урухомило збірку грошів на поміч для скансену в Саноку. Спалил ся гын XVII-вічный памятковый, безцінный костел і поблизка стодола. Колекту зорґанізували як жест солідарности польскых музейників з робітниками саноцкого скансену в звязку з траґедийом і стратом для культуры. Номер банкового рахунку до вплат находит ся на сайті стоваришыня. Директор Музею Народного Будівництва в Саноку Марцін Кровяк заповіл, што розважаны сут дві опциі – перша, жебы позыскати подібный обєкт і перенести го до скансену, а друга – реконструкция спаленого храму. Был то костел покровы св. Миколая з 1667 рока з Бончаля Нижнього коло Ясла. Оген знищыл храм в цілости.

Терочка выступит в Липинках

В найблизшу неділю 30. серпня/авґуста в Липинках одбуде ся Фестіваль Дожынковых Вінців. В проґрамі по божескій літургіі заплянували перехід і презентацию вінців, а пак артистичны выступы – слідом минулого рока запрошыня достала Терочка, яка вкаже лемківскій репертуар. Дале выступлят ансамбль Поляне з Кобылянкы, Капеля Цюпаґа, а до забавы заграт ґрупа То Мы.