Сумар дня на 27. серпня/авґуста 2021 р.

Приносиме вам сумар медияльной ґрупы ЛЕМ.фм+ на ден 27. серпня/авґуста 2021 р.

Новы выдавництва з карпатском темом

Як інформує Выдавництво Лібра, в вересни/септембрі тр. вкаже ся фундаментальна для історийоґрафіі Карпат моноґрафія проф. Павла Роберта Маґочія пн. «Pod osłoną gór. Dzieje Rusi Karpackiej i Karpatorusinów» в перекладі Марка Круля. Публикация вказала ся дотля іщы в анґлицкым і словацкым языках. Выдавництво на своім фейсбуковым профіли помістило сім проєктів окладинкы, якы зрыхтувал Кжыштоф Рыхтер. Голосувати мож через поставліня ляйка під выбраном окладинком. Іщы єдном публикацийом з карпатском темом, яка має ся вказати осіню тр., єст анґлицкоязычна «The Carpathians. Discovering the Highlands of Poland and Ukraine» (Карпаты. Одкрываючы Гірскы Терены Польщы і Украіны), авторства доктор Патріс М. Дабровскій, печатана выдавництвом Res Carpathica. Книжка тыкат выбраных карпатскых реґіонів в іх пілнічній части, в контексті безпосереднього влияня іх познаваня на ріжны процесы – нацийональны, державотворчы ци социяльны.

Скульпторска Симпозия в Габурі

Од 25. серпня/авґуста до 4. вересня/септембра в Габурі проходит 3. річник Скульпторской Симпозиі Олены Мандич-Шыналі. Головным орґанізатором подіі є Фундация Деревяна Церковця Габура. В тогорічній симпозиі бере участ дванадцетеро різбярів зо Словациі і Чешской Республикы. Головна тема стрічы тыкат старославяньскых богів і світа воды. Симпозия є одкрыта і про одвиджаючых, на котрых в окремых днях жде культурный проґрам. Олена Мандич-Шыналі (1902-1975) єст єдном з найвызначнійшых скульпторок меджевоєнного періоду в Чехословациі. Доднес є найвызначнійшом русиньском різбярком.

Ґміна Ропа змодернізує очыщальню одпадовой воды

Ґміна Ропа підписала догваріня на розбудову і модернізацию очыщальні одпадовой воды. Кошт інвестициі то близко мілийон злотых. На єй реализацию ґміна отримала дофінансуваня з Урядового Фонду Локальных Інвестиций. Заплянуваны працы будут обнимати модернізацию істнуючого реактора і доставу другого. В рамках задачы будут тіж выконаны проєктовы і рыхтуючы працы, роботы при технолоґічных і електричных інсталяциях, розрухы і школіня. Завдакы тому ефективніст очыщальні збільшыт ся з 250 до 500 м3 [кубометрів] на ден. Плянуваный термін завершыня робіт то 15. грудня/децембра того рока.

Выстава макєт неістнуючых церкви одкрыта іщы лем до кінця того місяця

Іщы лем до кінця серпня/авґуста в Едукацийно-Музейным Осередку ім. Яна Шафраньского в Крампній мож обзерати макєты церкви. В вересни/септембрі будут они замонтуваны при фундаментах неістнуючых уж церкви в Свіржові Рускій, Незнайовій, Тихани і Жыдівскым. Выстава макєт неістнуючых церкви єст реализувана в рамках проєкту «Біциґльом через погранича – природа, культура і істория на двох колесах» дофінансуваного Проґрамом Трансграничной Спілпрацы Інтерреґ Польща-Словация 2014-2020.