Сумар дня на 27. вересня/септембра 2024 р.

Приносиме вам сумар медияльной ґрупы ЛЕМ.фм+ на ден 27. вересня/септембра 2024 р.

Мілийон злотых веце на тогорічны меншыновы задачы

Середкы на реализацию публичных задач в тым році для нацийональных і етнічных меншын або реґіонального языка были звекшены о мілийон злотых. Як подано в Сервісі Польской Республикы, завдякы заанґажуваню секретаря стану МВСіА Томаша Шыманьского, рішыньом Міністра Фінансів з 20. вересня/септембра тр. 1 млн злотых цільовой резервы пн. Дофінансуваня реализациі дакотрых продолжаных задач звекшено середкы перезначены на реализацию в 2024 р. публичных задач маючых на ціли охорону, захованя і розвиток культуровой достоменности нацийональных і етнічных меншын або захованя і розвиток реґіонального языка. Департамент Реліґійных Віроісповідань та Нацийональных і Етнічных Меншын просит підметы заінтересуваны звекшыньом высокости дотациі на задачы реализуваны в тым році до зголошуваня волі завертя анексів до догварінь на реализацию публичных задач до найблизшого понеділька 30. вересня/септембра. Дрібниці мож найти в сервісі Польской Республикы в катеґориі Нацийональны і Етнічны Меншыны.

Поправит ся якіст доріг на польско-словацкым пограничы

На польско-словацкым пограничы в околици Дуклі і Західніх Карпат будут выремонтуваны дорогы. Як поінформувало одділіня комунікациі Пряшівского Самосправного Краю (ПСК), край в тых днях зачынат вызначны будовляны акциі за 3,5 млн евро. Інвестициі мают зліпшыти комфорт участників руху, скоротити час переізду і поправити дорогу. ПСК собі при обновліню доріг в окресах Стропків і Свидник поможе европейскыма середками з проґраму Interreg, завдякы польско-словацкій спілпрацы. Дрібниці на нашым портали.

Выклад др. Войцєха Крукара про тереновы назвы Низкого Бескіду в Рускій Бурсі в Ґорлицях 

В найближшый понедільок 30. вересня/септембра просиме до Руской Бурсы в Ґорлицях на выклад др. Войцєха Крукара пн. «Тереновы назвы Низкого Бескіду з особливым увзглядніньом ґорлицкого реґіону». Подія зачне ся о 18.00 год. Выклад буде выголошеный в польскым языку. Др Войцєх Крукар єст выдатным специалистом од карпатскых оронімів, автором вельох публикаций на тоту тему і автором вельох карпатскых мап од Низкого Вескіду по Чорногору, в котрых особливу вагу привязує до топонімів і мікротопонімів. Подія буде реализвана завдякы дотациі Міністра Внутрішніх Справ і Адміністрациі.

Округлый ювілей хорів Зоря і Роса

Уж заран в Устю Рускым одбуде ся ювілейный концерт хорів Зоря і Роса, якы будут празднувати 20-літя свойой діяльности. Оба ансамблі, діючы при Ґмінным Осередку Культуры в Устю Рускым, од років плекают музичну спадковину реґіону, презентуют традицийны лемківскы, украіньскы і погіряньскы співанкы. Окрем Зорі і Росы на концерті гостинно выступит ансамбль Бурян. Концерт одбуде ся в авли Комплексу Шкіл в Устю Рускым. Початок о 16.00 год. Вынятковым елементом ювілейного концерту буде премєра музичной платні під наголовком «Повороты». Альбум то свого рода підсумуваня послідніх років артистичной діяльности хору Зоря, находят ся на ним пісні, котры роками были основом репертуару хору. Буде то уж друга в доробку колективу платня. Веце про оба хоры і іх ювілей прочытате в дописі на нашым портали. Медже патронами подіі сут Стоваришыня «Руска Бурса» в Ґорлицях і медияльна ґрупа ЛЕМ.фм+.