Сумар дня на 27. жолтня/октобра 2023 р.

Приносиме вам сумар медияльной ґрупы ЛЕМ.фм+ на ден 27. жолтня/октобра 2023 р.

Словацкы власти одкликали полномічного про нацийональны меншыны

В середу 25. жолтня/октобра влада Словацкой Республикы під ведіньом премєра Роберта Фіца, котру выменувала в тот сам ден президентка Зузана Чапутова, одкликала на своім першым засіданю полномічного влады Словацкой Республикы про нацийональны меншыны Ласла Буковского. Так само одкликаный был полномічный влады СР про ромскы комуніты Ян Геро. Ласло Буковскій был на посаді полномічного од 2016 р. В социяльній сіти Буковскій написал, што не сут знаны пляны новых власти в обшыри просаджуваня і посиліня прав меншын, але надіє ся, же «не забудут на нацийональны меншыны, котры творят десят процент населіня, і будут брати до увагы іх специфічны потребы». Більше чытайте на нашым портали.

Новый пряшівскій архієпископ і митрополита

Папа Франциск выменувал вчера, в четвер 26. жолтня/октобра, в ден свята великомученика Димитрия, нового пряшівского архієпископа і митрополиту Грекокатолицкой Церкви на Словациі. Стал ним єромонах Йона (Йосиф) Максим, дотеперішній ігумен монастыря студитів в Унівскій Лаврі. Єромонах Йона походит з русиньского села Ольшавиця в окресі Левоча. Владыка Петро Руснак остає апостольскым адміністратором на выконуваня звычайной аґенды аж до перевзятя канонічных власти архієпархіі новым єпископом. Про нового пряшівского владыку прочытате в дописі на нашым портали.

Новы інвестициі в Тыличы

Як поінформувал бургомайстер Крениці Пьотр Рыба, в Тыличы поступуют будовляны працы при улицях Осєдльовій і Коперніка. Дотля было м.ін. перенесене уличне освітліня і выконаны водопроводны каналы. Іщы в тым році побудуют тротуар, а на початку будучого рока зачнут ся праци при новым покрытю обох улиц. Як подал бургомайстер, до червця/юнія будучого рока выконавці выбраны в конкурсі оферт завершат реализацию дальшых інвестиций в Тыличы, обнимаючых перебудову пристанку на Рынку і одбудову забытковой студні, будову двох пляців забав і будову пляжы з рекреацийныма обєктами при потоку Мохначка.

Польковиці выріжнены в проздравотным проґрамі

Ґміна Польковиці была выріжнена званьом «Лідер вакцинациі на каждым етапі жытя», в Загальнопольскым Проґрамі Борбы з Інфекцийныма Хворотами. Польковиці сут єдным з пятнадцетьох самоурядів в державі, котры отримали тото званя. Іде м.ін. о вакцины проти ґрипі і пневмококам, котры сут безплатны для осіб выже 60. рока жытя. Орґанізатором проґраму єст Фундация «Надія для здоровля». Єй цілю єст едукация в обшыри профіляктикы і лікуваня хронічных хворіт. Фундация сперат хворых і іх близкых в борбі о права пациєнта і доступ до лікуваня в рамках обовязуючого в Польщы систему охороны здоровля.

Молитовный вечер в ліґницкій церкви

Як поінформувал сайт Православной Вроцлавско-Щеціньской Єпархіі, в ліґницкій церкви одбыл ся молитовный вечер в рамках 16 Ліґницкых Християньскых Дни, котры проходили в Ліґници в днях од 15. до 22. жолтня/октобра. Як каждого рока, до спільного святкуваня была запрошена Православна Парохія Воскресіня Господнього в Ліґници. В рамках молитовных стріч в ріжных святынях, в минулу пятницю в ліґницкій церкви был одслуженый акафист в польскым языку до св. Спіридона Тримифунтского, а пак прошла стріча в парохіяльній світлици.

Джерело фотоґрафіі: FB Piotr Ryba