Голосник

Сумар дня на 28. грудня/децембра 2020 р.

Приносиме вам сумар медияльной ґрупы ЛЕМ.фм+ на ден 28. грудня/децембра 2020 р.


Вседержавна кварантанна

Од днес, 28. грудня/децембра, обовязує в Польщы вседержавна кварантанна. Має она обовязувати до 17. січня/януара 2021 рока. Введены сут і новы ограничыня. Важном зміном є заказ гандлю в обєктах выже 200м2. Закрыты сут гандльовы центры. Подля розпоряджыня одкрыты в центрах остают м.ін склепы з ідлом, аптыкы, дроґериі, книгарні, зоолоґічны і будівляны склепы. Додатково заказ обнимат ведіня услуговой діяльности в гандльовых центрах, з вылучыньом м.ін. фризиєрскых, косметичных, почтовых і банковых услуг. Новы ограничыня обнимают і закрытя готелів і інчых нічліговых місц для туристів і подорожуючых в службовых справах. Од днес готелі можут быти хоснуваны лем м.ін. медиками, членами самольотовых екіп, водителів і частю функцийонерів державных служб, як тіж дипломаты і спортовці. Лыжны стациі будут одкрыты лем в рамках професийного спорту. Згідно з розпоряджыньом реставрациі можут выдавати ідло лем на вынос. Закрыты остают дискотекы, клюбы, басены, силовні, пункты фітнес, як тіж вшелеяка спортова інфраструктура. Додатково в ночы з 31. грудня/децембра на 1. січня/януара буде обовязувал заказ переміщаня ся з вынятком м.ін. на выконуваня необхідных службовых справ.

Польскій проґрам вакцин

Вчера на фейсбуковым профіли Канцеляриі Премєра Польской Республикы прошла відеоконференция Шефа Рады Міністрів Матеуша Моравєцкого, міністра здоровля Адама Нєдзєльского та Шефа Канцеляриі Шефа Рады Міністрів Михала Дворчыка. Головном темом бесіды был державный проґам вакцин, якій уж выстартувал в Польщы для тзв. ґрупы «0», в яку ся враховує медичный персонель, як тіж працівникы Містецкых Осердків і Домів Социяльной Помочы. Записы для ґрупы «0» сут одкрыты лем до днес. В суботу, 26. грудня/децембра, до Польщы дотерло першых 10 тисячів доз вакцин проти Covid-19, а до кінця рока мат іх прити наступных 300 тисячів. 15. січня/януара мают быти одкрыты записы для наступных ґруп жытелів. Першый етап проґраму обнимат вакцинацию ґруп “0” і “1”. Ґрупа “1” обнимат м.ін. особы выже 60 рока жытя, мундуровы службы і учытелів. Проґрам вакцин тішыт ся попрертьом лем части польскых граждан. Вчас конференциі пало м.ін. звіданя, тыкаюче вакцинациі польскых власти. Міністер Моравєцкій подал, што запише ся до проґраму, коли лем выстартуют записы. Вакцину прийме єднак згідно з гармоноґрамом, значыт не перше як в посліднім, третім етапі вакцинациі. Власти предвидуют видіти результаты проґраму вакцин в другій чвертці 2021 р. Участ в проґрамі вакцин проти Covid-19 єст в Польщы необовязкова.

IX Фестіваль Церковных Хорів в Креници

Вчера, 27. грудня/децембра прошол в Православній Парохіі св. Владиміра Великого в Креници IX Фестіваль Церковных Хорів в Креници. З причын обовязуючых в державі ограничынь, фестіваль проходил в формі онляйн на фейсбуковым фанпейджы креницкой парохіі. На фестівалю запрезентували ся Хор Православной Парохіі св. Владиміра в Креници, Мужскій Камеральный Співочый Ансамбль «Пафос»з Білогостока, Хор «Зоря» з Устя Руского і Співочый Ансамбль «Мирраест» з Вроцлавя. Хоры презентували церковны творы, як і коляды. Фестіваль был зреализуваный при фінансовым спертю Малопольского Воєвідства і Міста Крениця. Хто не мал вчера нагоды послухати переносу з концерту, може го іщы найти на фейсбуковым фанпейджы креницкой парохіі.

Нова «Маґура»

Вышол черговый, послідній уж в тым році номер часопису Маґура. Прочытате в ним м.ін. статіі про нейменше знаного жытеля Парку – дикого кота, одкрытя новой природничой стежкы, ци історию з Крампной. На послідній страні традицийно найдете забаву для діти і дорослых з неочывидным розвязаньом. Часопис Маґура доступный єст до побраня на офіцияльным сайті Маґурского Нацийонального Парку. Єдночасно мож тіж придбати друкувану «Маґуру», напримір в сідибі Маґурского Нацийонального Парку в Крампній.

Шеруй.

О авторі

Ленка Стефановска

Коментарі