Сумар дня на 28. січня/януара 2022 р.

Приносиме вам сумар медияльной ґрупы ЛЕМ.фм+ на ден 28. січня/януара 2022 р.

Субвенция на вчыня меншыновых языків не буде привернена

Вчера, 27. січня/януара, польскій Сойм одшмарил вшыткы поправкы Сенату до буджетового закону на 2022 р. Згідно з правом закон буде тепер підписаный президентом державы, котрый не може го заветувати. Медже поправками Сенату находила ся поправка о приверніню субвенциі на вчыня языків нацийональных і етнічных меншын та реґіонального языка в школах в высокости 39 млн 800 тис. злотых. Зменшыня освітовой субвенциі выкликало в Польщы много протестів. О єй приверніня апелювали м.ін. представникы меншын, Спільной Комісиі Уряду та Нацийональных Меншын, ци академіцкє середовиско. Зато же речена поправка была Соймом одшмарена, субвенция на вчыня меншыновых языків в школах верне до рівня пропонуваного властями в проєкті буджетового закону в вересни/септембрі минулого рока – буде зменшена о близко 40 млн злотых.

Першы результаты Нацийонального Повселюдного Списуваня

Так само вчера опубликуваны были першы результаты Нацийонального Повселюдного Списуваня, якє проходило в Польщы в минулым році. Публикацию пн. «Інформация о вступных результатах Нацийонального Повселюдного Списуваня Люди і Мешкань 2021» мож найти на офіцийным сайті Головного Статистичного Уряду. Опубликуваны даны тыкают чысла і структуры населіня, як і чысла мешкань і будинків в державі. Окрем загального чысла населіня, якє вынесло 38 млн 179,8 тис. люди, значыт о близко процент менше як в попереднім списуваню, поданы сут тіж чысла жен і мужчын, та населіня і його структура подля економічных ґруп віку. Чысло мешкань в державі збільшыло ся в порівнаню до результатів спису з 2011 р. о 12,6% і выносит 15,2 млн. Дальшы результаты списуваня будут публикуваны подля гармоноґраму, котрый так само находит ся на сайті Уряду. Найважнійшы інформациі про лемківску і інчы меншыны, тє. нацийонально-етнічну структуру: нацийонально-етнічну приналежніст і язык хоснуваный дома, будут постепенно додаваны до баз даных аж в періоді од вересня/септембра до листопада/новембра тр. Фінальна аналитична публикация про «Стан і демоґрафічно-социяльну і економічну структуру населіня Польщы», што тыкат м.ін. нацийонально-етнічной приналежности, материньского языка і конфесийной приналежности, єст плянувана на вересен/септембер 2023 рока.

В ґміні Санкова выремонтуют цмонтері з І світовой войны

Іщы в тым році має ся завершыти ремонт дванадцетьох цмонтерів з І світовой войны, находячых ся в ґміні Санкова. Війт ґміны Малґожата Малух підписала догваріня з пятьома фірмами, якы проведит ремонтовы роботы на цмонтерях в Чорным, Бортным, Ропици Выжній, Рыхвалді, Санковій, Мацині Великій і Вапенным. Ремонтовы і консерваторскы працы реализуваны в рамках польско-словацкого проєкту мают коштувати близко 4 млн злотых. Вшыткы консерваторскы працы будут попереджены переглядом архівальных документів, плянів, проєктів, описів і фотоґрафій.

Новы Ґрупы Медичного Ратівництва в ґорлицкым повіті

Медичне ратівництво в ґорлицкым повіті збогатит ся о дві Ґрупы. Малопольскій воєвода Лукаш Кміта піднял рішыня зміцнити Карпатскій Операцийный Реґіон о сім дальшых Ґруп Медичного Ратівництва, з чого дві стацийонувати будут в Ґорлицях і Бічу. Причыном такого рішыня єст фурт збільшаюче ся чысло осіб зараженых коронавірусом, котры потрібуют госпітализациі і респіраторів. Ґрупы будут діяти в рамках Специялистичного Шпыталя в Ґорлицях.

джерело знимкы: www.stat.gov.pl