Сумар дня на 28. жолтня/октобра 2021 р.

Приносиме вам сумар медияльной ґрупы ЛЕМ.фм+ на ден 28. жолтня/октобра 2021 р.

Бесіда о русиньскым театрі

21. жолтня/октобра в Новым Саді, в Секретарияті про Культуру, Публичне Інформуваня і Односины з Реліґійныма Ґрупами Автономной Области Войводина, проходила робоча стріча з ініциятивы Нацийонального Совіту Русинів. На стрічы, окрем інчых, был присутный председа Нацийонального Совіту Русинів Борислав Сакач і директор Русиньского Народного Театру «Петро Ризнич Дядя», Славко Орос. Стріча была скликана з причыны тяжкых обставин, в котрых ся русиньскій театр находит уж долшый час. Бесідували о ключовых темах, котры треба порішыти, жебы досягнути тырвале рішыня про оптимальне фунґуваня той театральной інституциі Русинів в Сербіі. В першым шорі є вопрос фінансуваня і заряджаня театром. Урядова страна приобіцяла, же власти розсмотрят представлены пропозициі. Бесідували і на тему побудуваня окремого театрального обєкту в Новым Саді, котрый бы служыл нацийональным меншынам.

Проґрам пшемківскых Стріч

Як сме уж інформували, 6. листопада/новембра в Пшемкові одбудут ся XIV Стрічы Трьох Поколінь з Лемківском Культуром. Подія, котру орґанізує місцевый Кружок Стоваришыня Лемків, зачне ся о 16.00 год. Знаме уж тогорічных артистів, якы будут прикрашати імпрезу. Окрем ґаздів – дітячого ансамблю Ластівчата і ЛАПіТ «Ластівочка», на подіі запрезентує ся ансамбль з Лемковины – Терочка з Ґорлиц. Буде і мила несподіванка – по долгых роках специяльно на тоту подію реактивує ся ансамбль ДаМир, якій має в своім доробку єдну платню. XIV Стрічы Трьох Поколінь з Лемківском Культуром пройдут в Пшемківскым Осередку Культуры. Вступне дармо.

Собор ПАПЦ рішыл і про справы тыкаючы Лемковины

26. жолтня/октобра в Варшаві засідал Собор Єпископів Польской Автокефальной Православной Церкви (ПАПЦ). Владыкы занимали ся зовнішніма і внутрішніма темами, в тым тыма, якы дотуляют ся Лемковины. Собор піднял рішыня м.ін. в справі установліня нового ордеру о загальномитрополитарным характері. В рамках соборных робіт запознали ся з результатами працы Комісиі дс. тлумачыня Святого Писма Нового Завіту на польскій язык. Собор рішыл вписати до лику святых особы з обшыри люблиньско-холмской єпархіі. З огляду на міґрацийну кризу рішено, жебы Осередок Милосердя ЕЛЕОС занял ся помочом для потрібуючых. Рішено і колекты, в тым на дві лемківскы церкви: в Ґорлицях в липци/юлию 2022 р. і в Перегримці в серпни/авґусті 2022. Собор розсмотріл і рішыня Митрополитарной Комісиі і знял суспенсу з о. др Аркадия Баранчука, бывшого пароха Ґладышова, Реґєтова, Ждыні і Конечной.

Ґміна Санкова ремонтує три дорогы

В Уряді Ґміны Санкова одбыло ся підписаня умовы на ремонт доріг фінансуваных з середків презначеных на усуваня наслідств злив. Ґміна од Малопольского Воєводы отримала 600 тис. зл. За тоты грошы будут выремонтуваны три дорогы на лемківскых селах. Будут то дорогы в Мацині, в Ропици Рускій при цмонтери та дорога в Рыхвалді. Разом выремонтуваных буде 980 метрів. Польска держава дофінансувала усуваня наслідств злив і потопів в ґміні Санкова в высокости 80% на квоту понад 389 тис. зл.