Сумар дня на 29. грудня/децембра 2025 р.

Приносиме вам сумар медияльной ґрупы ЛЕМ.фм+ на ден 29. грудня/децембра 2025 р.

Два одтинкы S19 на Підкарпатю одданы до хоснуваня

Як в минулым тыжни інформувала Ґенеральна Дирекция Доріг і Автострад, оддали до хоснуваня два одтинкы експресовой дорогы S19: Коросно – Місце Пястове та Місце Пястове – Дукля. То разом веце як 20 км новой трасы, котра значучо одтяжыт дотеперішню державну дорогу нр 19, особливо скрижуваня з державном дорогом нр 28. Оба одтинкы были удоступнены шоферам на основі переіздности – то значыт, же головна траса єст одкрыта, але обовязуют на ній даякы ограничыня. До часу замонтуваня полного огороджыня дорогы, на S19 обовязує ограничыня скорости до 80 км/г. По отриманю вымаганых позволінь на одтинку до Дуклі будут одкрыты Місця Обслугы Подорожуючых. Кошт реализациі обох одтинків то разом 844 млн злотых. Завдякы будові експресовой дорогы S19 мала бы ся поправити плынніст руху і скоротити час переізду на оси пілніч-полудне. Окрем того звекшыт ся безпека хоснувателів дорогы, а реґіон одкрыє ся на ліпшы получыня з рештом державы і полудньом Европы, предовшыткым зо Словацийом і Мадярами. Дорога буде частю медженародного траспортового шляку Via Carpatia, што в будучности получыт Пілнічну і Полудньову Европу.

Радник президента СР про нацийональны соспільности подал резиґнацию

В віторок 23. грудня/децембра радник президента Словацкой Республикы Петра Пеллеґірні про нацийональны соспільности Кристиян Форро подал резиґнацию. Форро был выменуваный до функциі радника в справах менышн в маю минулого рока. В минулым был председом партиі Magyar Szövetség – Maďarská aliancia, і в році 2024 кандидувал на президента Словацкой Республикы. Причыном резиґнациі Форро было підписаня президентом Пеллеґріні новелизациі Карного кодексу, котрой част тыкат Бенешовых декретів. На іх основі по ІІ світовій войні конфіскували ся маєткы Мадярів, Німців і колаборантів, якы пак были выселяны з Чехословациі, на основі колективной вины. Бенешовы декреты остали частю правного порядку Словацкой Республикы, котра выникла в 1993 р., але подля анализы Міністерства Справедливости з 2002 ефективніст Бенешовых декретів в правным порядку была зрушена найпізнійше кінцьом 1991 р., з причыны принятя Листины Основных Людскых Прав і Свобід. Єднак дакотры політикы і медиі зачали вказувати на факт, што Словацкій фонд фундушів дальше хоснує Бенешовы декреты на конфіскуваня приватных фундушів. Одповідю владных партий было принятя новелизациі Карного кодексу в скороченым леґіслятивным процесі. Новый Карный кодекс запроваджат карну одповідальніст за заперечаня або спохыбнюваня повойєнных документів ґу упорядкуваню обставин по ІІ світовій войні на Словациі. Веце на тоту тему прочытате в дописі на нашым портали.

Затверджены выказы меншыновых задач, што отримают дофінансуваня МВСіА

Міністер Внутрішніх Справ і Адміністрациі затвердил выказы задач в 2026 р. для захованя культурной достоменности нацийональных і етнічных меншын або захованя і розвитку реґіонального языка, што отримают дотациі. За лемківску меншыну підметовы дотациі на діяльніст в будучым році отримают Стоваришыня Лемків, Стоваришыня «Руска Бурса» в Ґорлицях, Товариство для розвитку Музею Лемківской Культуры, Лемківскій Ансамбль Пісні і Танця Кычера, Обєднаня Лемків і Стоваришыня Лемко Тавер. Вымінены орґанізациі сут тіж бенефіциєнтами цільовых дотаций. Окрем того цільовы дотациі за лемківску меншыну были тіж признаны Єпархіяльному Осередкови Православной Культуры «Ельпіс» і Стоваришыню Промоциі Лемківской Творчости «Серенча». Цільовы дотациі на медиі были признаны для Стоваришыня Лемко Тавер та на діяльніст медияльной ґрупы ЛЕМ.фм для Стоваришыня «Руска Бурса» в Ґорлицях. Полны выказы дофінансувань сут опубликуваны в Сервісі Польской Республикы.