Сумар дня на 29. мая 2025 р.

Приносиме вам сумар медияльной ґрупы ЛЕМ.фм+ на ден 29. мая 2025 р.

Поломництво з західніх земель на Святу Гору Явір

Як інформує православна вроцлавско-щецінска єпархія – з благословліня архієпископа Юрия оголошене было запрошыня до участи в поломництві на Святу Гору Явір. Поломництво з західніх земель одбуде ся в днях 11.–13. липця/юлия – так, жебы вірны могли взяти участ в головным празднику – свв. Ап. Петра і Павла. Тогорічны святкуваня на Святій Горі Явір будут вынятковы, кєд же церков споминат 100. років од першых обявлінь на Яворі. Поломництво зачне ся 11. липця/юлия выіздом спід православной церкви в Ліґници. Одтамале поломникы підут через Любін до Вроцлавя, де досядут дальшы участникы. Кошт поломництва то 700 зл. Зголошыня треба подавати до 15. червця/юнія, м.ін. на е-майльовый адрес: stowpraw.wroclaw@interia.pl.

Іспанія хоче вызнаня меншыновых языків

Іспанія має намагу пересвідчыти державы Европейской Уніі, жебы признати баскійскій, каталоньскій і ґалицийскій язык за офіцияльны языкы Евросоюза. Кєд бы тото Мадрид досягнул, был бы то прецеденс і про далшы языкы меншын, котры жыют в державах Уніі. О признаня тых трьох меншыновых языків за офіцияльны Іспанія неуспішно прібувала уж в році 2023. Того тыжня зас Мадрид в Бруксели предложыл тоту тему і подарило ся му єй достати до проґраму засіданя Рады про заграничны діла, котре одбыло ся в віторок 27. мая 2025 р. Іспаньска дипломация два попередні рокы присвятила лоббуваню в здобытю підпоры на тоту ініциятиву. Пляны Мадриду підтримуют Бельґія, Кыпр, Портуґалия, Нідерлянды, Румунія і Словация. Твердо проти сут напримір Німці і Франция. На тот момент Унія має 24 офіцияльных языків, но в рамках 27-членного бльоку бесідує ся приблизно шістедсятьома меншыновыма языками.

Конкурс!

Припоминаме, што іщы лем до найблизшой суботы 31. мая мож взяти участ в плястичным конкурсі для діти під наголовком «Я i Никыфор», якій орґанізує Стоваришыня «Руска Бурса» в Ґорлицях. Реґулямін конкурсу найдете на нашым сайті в закладці Подіі. Плястичны працы мают односити ся до творчости Епіфана Дровняка – Никыфора. Конкурс є презначеный для вшыткых учеників кляс основной школы і предшколяків. Єден автор може зголосити лем єдну працу в форматі A4. Передвиджено атракцийны нагороды!