Сумар дня на 3. червця/юнія 2026 р.

Приносиме вам сумар медияльной ґрупы ЛЕМ.фм+ на ден 3. червця/юнія 2026 р.

Дария Кузяк на стрічы в міністры Культуры і Нацийональной Спадковины

Лемківска артистка Дария Кузяк взяла участ в пресовым сніданю зорґанізуваным Міністерством Культуры і Нацийональной Спадковины. Стріча одбыла ся з участю міністры Марты Цєнковской і тыкала рыхтуваной уставы о социяльным забезпечыню осіб, котры выконуют артистичну професию. В подіі участ взяло шестеро артистів, якы оповідали о своій роботі і реалиях творчого діяня. Як подала Дария Кузяк, ішло о тото, жебы вказати, як выглядат робота артисты, з якыма выкликами ся міряют наштоден. Підчас бесіды каждый з участників міг запрезентувати свою діяльніст. Дария оповіла м.ін. о опері інспіруваній лемківском культуром. Підкрислила значыня спадковины Лемків в єй творчости. Кузяк передала міністрі символичны подаркы – триптих «Переселили нас мусово» і кривульку. Згідні з інформациями міністерства, цілю уставы єст дати основне социяльне забезпечыня артистам, якы часто працуют без постійного затрудніня. Стріча в міністры прошла в минулый четвер, 28. мая.

Боіско в Брунариі буде змодернізуване

Ґміна Устя Рускє інформує, што здобыла веце як 1,2 млн зл дофінансуваня з Міністерства Спорту і Туристикы на модернізацию полновымірового футбольового боіска в Брунариі. Ціла інвестиция буде коштувала 2,4 млн зл. Як дальше заявлят уряд – завдякы тій інвестициі мекшанці ґміны, а головні, спортсмены ЛЬКС «Біла» Брунария будут мати модерне і функцийональне місце до заниманя ся спортом і орґанізуваня спортовых подій. Модернізация поправит условія до тренуваня, звекшыт доступніст обєкту, а тым самым уможливит векшый розвиток фізичной активности в ґміні. В рамках задачы верхню верству боіска вымінят на натуральну, вымінят освітліня на такє в технолоґіі ЛЕД, зроблят бетонове обрамуваня довкола боіска, зміцнят верхню верству зоны для люди з неполносправностями.

Уж о хвилю Пікнік Лемківской Культуры в Ріпках

Припоминаме, што в найблизшых днях в Ріпках одбуде ся Пікнік Лемківской Культуры – В себе, орґанізуваный з нагоды ювілею 80. уродин Кжыстофа Кжыжановского та ювілею 65-літя TVP. В проґрамі єст м.ін. перегляд твореных Кжыштофом Кжыжановскым документальных фільмів о Лемках з товаришучыма дискусиями. Будут тіж концерты. Выступлят м.ін. Юлия Дошна і Івона Іскра Криницка, Мариянна Железна та Оркєстра Святого Миколая. Зо спектакльом выступит тіж Меджеполіньова Театральна Ґрупа Племя з Устя Руского. В проґрамі єст тіж чытаня лемківской поезиі – свою участ потвердил найвыдатнійшый лемківскій поета – Петро Мурянка. Окрем того будут варштаты співу і зілярства, презентациі традиций реґіону, лемківской кухні, кєрмеш творів ручной роботы, а аж і кінна ізда. Каждый ден подіі завершыт огниско.

Підсумували інвестициі ґорлицкого повіту

Веце як 53 млн зл на інвестициі і ремонты в ґорлицкым повіті – підчас XXIII сесиі Рады Повіту, котра одбыла ся 29. мая, радны підсумували найважнійшы діяня та стан фінансів самоуряду. В 2025 році сумарична вартіст реализуваных ініциятив была векша як 53 млн зл, з чого веце як 37 млн зл то середкы позысканы з зовнішніх джерел. Великій натиск был положеный на розвиток дороговой інфраструктуры – на тоту ціль перезначено 13 мнл зл. Серед основных діянь нашли ся м.ін. розбудова доріг, будова мостів та поправа безпекы – новы пішникы і барєры. Самоуряд інвестувал тіж в едукацию і службу здоровля. Підчас засіданя радны запознали ся з рапортом о стані повіту і приняли схваліня, котры тыкали м.ін. буджету і спілпрацы з позаурядовыма орґанізациями. Власти підкрисляют, што шырокій спектр інвестиций має безпосередньо переложыти ся на поправу якости жытя мешканців і дальшый розвиток реґіону.