Сумар дня на 3. липця/юлия 2023 р.

Приносиме вам сумар медияльной ґрупы ЛЕМ.фм+ на ден 3. липця/юлия 2023 р.

Місце для докторанта на русиністиці

Пряшівскій Університет – Центр Языків і Культур Нацийональных Меншын – Інститут Русиньского Языка і Культуры прийме на 4-річны денны докторантскы студиі на напрямі Славістика – русиньскій язык і література єдного абсольвента маґістерского проґраму заміряного на філолоґію, котрый знає азбуку, русиньскій язык – стандарды, словацкій язык або інчы східньо- і західньославяньскы языкы. Тема дисертацийной працы то «Карпатизмы в русиньскых і словацкых діалектах (на материялі Цілокарпатского діалектолоґічного атлясу». Зголошыня будут приниманы до 15. серпня/авґуста тр.

Дальша мілийонова інвестиция PKL

Ґміна Мушына єст штораз ближе реализациі ключовой інвестициі, котрой результатом буде поворот лыжной туристикы до Щавника. В лыжну стацию в Щавнику хоче заінвестувати Польска Кабельна Желізниця (PKL). Днес має быти підписане догваріня зо стратеґічным інвестором. Жебы вошло в жытя, мусит ся згодити Уряд Контролі і Конкуренциі Консументів. Єдночасно ґміна Мушына затримат част своіх уділів і буде мала свою репрезентацию в спілці одповідальній за лыжный осередок в Щавнику. В рамках догваріня PKL мало бы в першым етапі купити уділы в підвысшеным капіталі ґмінной спілкы, покликаной цілю зреализуваня інвестициі, за 20 млн злотых. Як подал бургомайстер Мушыны Ян Ґольба, окрем того підмет має заінвестувати мінімально 75 млн злотых в конкретны задачы, м.ін. модернізацию або перебудову істнуючой кабельной колейкы і выжньолыжных вытягів, будову наступной колейкы, модернізацию систему насніжаня і одкрытя трас для гірскых біциґлів та паркінґу. Окрем того мали бы быти одкрыты ґастрономічны пункты і выпожычальня лыжного ґратя.

ХІІ Етноґрафічный Роверовый Райд

Стоваришыня GorliceBike і Скансен Погіряньского Села ім. проф. Романа Райнфуса в Шымбарку, при спертю Міста Ґорлиці, просят на черговый, уж ХІІ Етноґрафічный Роверовый Райд Слідами проф. Романа Райнфуса. Райд пройде в найблизшу неділю 9. липця/юлия тр. Орґанізаторы прирыхтували три трасы, котры скінчат ся в Скансені в Шымбарку. Найлегша траса, родинна – рекреацийна (7 км), піде з Ґорлиц роверовом стежком вздолж рікы Ропа. Tуристична траса «Таємниці середвічного Біча» (38 км) піде з Ґлиника через Біч, Лібушу і Кобылянку до Ґорлиц і дале вздолж рікы Ропа. Найтяжша, заавансувана траса МТБ (60 км) веде через Лемковину – має початок в Фолюшы і піде м.ін. через Свіржовску Поляну, Святкову Велику, Новицю і Білянку. На конец змагань участникы стрітят ся в Скансені на спільным пікніку. Реґістрация участи в Райді єст одкрыта іщы до позаране, до середы 5. липця/юлия.

Выізд для діти з Руской Бурсы

Припоминаме, што Стоваришыня «Руска Бурса» в Ґорлицях орґанізує для охочых діти выізд з нагоды кінця шкільного рока і початку вакаций. Запрашаме на дармову прогульку до Етноґрафічного Парку Музею Народной Культуры в Кольбушовій. В проґрамі выізду буде обзераня скансесну, варштаты, печыня кобаскы і спільне музикуваня. Прогулька одбуде ся в найблизшу середу 5. липця/юлия, выізд о год. 7.30 спід будинку Бурсы. Родиче прошены сут зголосити охочы діти до участи в прогульці до днес до 20.00 год., пишучы на майльовый адрес sekretariat@ruskabursa.org, мож тіж дзвонити під номер: 606108701. Просиме діти в каждым віку.