Сумар дня на 5. жолтня/октобра 2026 р.

Приносиме вам сумар медияльной ґрупы ЛЕМ.фм+ на ден 5. жолтня/октобра 2026 р.

Вмер русиньскій архітект-памяткар Іван Ґойдич

27. вересня/септембра, маючы 78 років, вмер Іван Ґойдич, вызначный русиньскій архітект-памяткар, бадатель і педаґоґ. Іван Ґойдич родил ся в 1948 р. в Гуменным. По Акциі П в році 1950, коли дошло до ліквідациі Грекокатолицкой Церкви в товдышній Чехословациі, родина была выселена до Красной над Горнадом, недалеко Кошыц. В 1973 р. в Братиславі Іван Ґойдич завершыл студиі з архітектуры зо спецяльністю історична архітектура в Словацкій Высшій Технічній Школі. Зачал робити в Словацкым Інституті Охороны Забытків і Природы. В дальшых роках полнил м.ін. функцию директора Словацкого Памятково Інституту. Был тіж ведучым Катедры Істориі і Теориі Штукы на Філософічным Факультеті Тырнавского Університету, як і продеканом того же факультету. Выховал так цілый шор памяткарів і реализаторів архітекто-історичных бадань. Сам был активным дослідником народных культурных памяток. Вратувал вельо деревяных церкви. За долгорічный вклад і охорону памяткового фонду был выріжненый оцініньом Памяткового Уряду Словацкой Республикы – Премійом Альжбеты Ґінтеровой-Маєровой. Похоронны богослуюжыня прошли вчера в Грекокатолицкым Катедральным Соборі Воздвижыня Честного Креста в Братиславі. Вічна памят!

«Наука вельох Культур! Шлезакы, Кашебы, Лемкы… а популяризация Наукы».

В найблизшу середу 7. жолтня/октобра в Малопольскым Центрі Наукы в Кракові, в рамках конференциі SPIN 2026 «Наука для вшыткых?», одбуде ся панель з назвом «Наука вельох Культур! Шлезакы, Кашебы, Лемкы… а популяризация Наукы». Участниками панелю, котрый поведе др Томаш Гуч, будут проф. Ева Міхна, др Каміль Чаіньскій і др Артур Яблоньскій. Панелисты будут дискутувати о тым, ци запутаны науковы вопросы мож оповідати через локальны істориі, языкы, досвідчыня і культуровы коды – ци наука може быти барже доступна, коли бесідуєме о ній языком близкым конкретным соспільствам.

«Поворот Лемків до православя» в TVP2

Заран в польскій державній телевізиі TVP2 мож буде обізрити репортаж Пьотра Кота пн. «Поворот Лемків до православя». Проґрам має припомнути історичны діі сперед 100 років, але і одповісти на звіданя, як днес выглядат православя на Лемковні та як тепер смотрит на історию, пережытя і сучасны вызваня старше і молодше поколіня Лемків. Репортаж мож обзерати на каналі TVP2 заран о год. 6:25. Пак буде тіж доступый в стрімінґовым сервісі TVP VOD.

Музей Лемківской Культуры в Зындрановій веде скуп експонатів

Музей Лемківской Культуры в Зындрановій веде скуп експонатів (старого нарядя, машын, предметів штоденного хосну, народных кроів і тым подібных). Кєд дахто має такы річы і не сут му потрібны, може ся сконтактувати з Музейом через майльовый адрес muzeum@zyndranowa.org або телефонічні. Дрібниці найдете на фейсбуковым сайті Музею Лемківской Культуры в Зындрановій.

Записы на Лемковина Трейль были выдолжены

Як інформуют орґанізаторы Лемковина Трейль, записы на черговы змаганя были выдолжены до найблизшой середы 7. жолтня/октобра. Змаганя одбудут ся в днях од 16. до 18. жолтня/октобра путями Низкого Бескіду. Спортовці можут стартувати на парох дистансах: од 10 до аж і 150 км. Трасы ведут м.ін. Головным Бескідскым Шляком через вынятковой красы обшыри Лемковины. Лемковина Трейль од років притігат тисячы участників з цілой Польщы і заграниці. В середовиску бігачів принимат ся єй за єдну з найважнійшых подій ультра в Польщы.