Сумар дня на 30. вересня/септембра 2022 р.

Приносиме вам сумар медияльной ґрупы ЛЕМ.фм+ на ден 30. вересня/септембра 2022 р.

Першы радийовы варштаты для діти в Рускій Бурсі в Ґорлицях

Уж заран, 1. жолтня/окторба, в будинку Руской Бурсы в Ґорлицях пройдут першы варштаты радийового кумшту для діти. Варштаты сут дармовы, не маме віковых ограничынь. Хочеме вказати, як «од кухні» выглядат наша штоденна робота і што сме готовы одкрывати новы таланты і давати можніст ставляти першы крокы в світі русиньскых медий наступным ґенерациям. Школіня для адептів радийового фаху зачне ся о 13.00 год. професийным розгрітьом голосу і ґамбы, пак участникы дознают ся, як зробити гавкаючого джінґля, котрый пошырит нашу радийову базу. А кєд найдут ся охочы молоды акторы, та вєдно з редакторами нашого радия награме радийове слуховиско.

В Рускым Керестурі одпрезентували книжну пн. «Русиньска ґімназия»

Як інформувала школа Петро Кузмяк в Рускым Керестурі в Сербіі, в понедільок – 26. вересня/септембра, в шкільных просторах при нагоді Европейского Дня Языків, одпрезентувана была книжна пн. «Русиньска ґімназия». Тото двоязычне, русиньско-сербскє выданя представила авторка Ірина Папуґа, а в бесіді участ брала і Олена Папуґа, державный секретар в Міністерстві за людскы і меншыновы права і социяльный діалоґ, котре фінансово підперло друкуваня книжкы о ґімназиі. Короткій проґрам зрыхтували разом з учытельками і ученикы русиньского одділіня ґімназиі.

Екуменічне богослужыня при нагоді Нижньошлезского Свята Меду і Вина

В минулый вікенд в Пшемкові проходило XXII Нижньошлезскє Свято Меду і Вина. Пшемківскє свято, окрем медів і вина, то тіж богатый в атракциі проґрам. На естраді презентувал ся м.ін. ансамбль Ластівочка. Традицийом є, што в другій ден проходит екуменічне богослужыня в єдным з пшемківскых храмів. Того рока Літругію одправили в православній церкви покровы св. Михала Архангела. Літургію слижыл загальнопольскій капелян пчолярів о. Ігор Попович. Присутны были м.ін. парохы місцевых парохій і державны душпастырі пчолярів, та почестны гості – представникы Сойму, Сенату, Воєвідскых Власти, Староства, Бургомайстер міста і ґміны Пшемків. Дальше посвячены были меды, воск і воскова свічка, яка ся має найблизшый рік палити перед іконом св. Амвросия. Наконец пісню до Богородиці одспівали діти. Лемківскы пчолярі сут чысленном ґрупом на західніх землях Польщы, в орґанізациі свята неперестанно помагат Василь Хомяк, пчоляр, бывшый член Головного Заряду Пчолярів Польской Республикы.

Біциґльовый райд МНП «Ровером через погранича»

Маґурскій Нацийональный Парк просит до участи в біциґльовым райді «Ровером через погранича». Жебы взяти участ в райді, не треба ся реґіструвати, старчыт переіхати самому або в ґрупі єдном з пропонуваных трас, в терміні од 9. жолтня/октобра до 15. листопада/новембра. Першых 100 участників райду, якы сполнят окрислены в реґуляміні вымаганя, отримат памятковы пакєты – окрем інчого треба переіхати мінімально 10 км пропонуваных трас і удокументувати то слідом GPS, та зробити найменче 5 фотоґрафій контрольных пунктів находячых ся на трасі.

Уж заран пройде редик в Ославици

Заран, 1. жолтня/октобра, одбуде ся подія «На пастырскым пути – Редик в Ославици». Стріча пройде в колибі у Франоса в Ославици. Зачне ся о год. 13.30 од того, же трембіты кликати будут уці, але уж скорше, о 11.00 год. мож буде взяти участ в зілярскій прогульці. В проґрамі подіі находит ся деґустация сырів, показ пастырскых інструментів, ткацтва, ярмак реґіональных продуктів, выступы музичных ансамблів і лемківскы забавы для діти.