Сумар дня на 31. марця 2025 р.

Приносиме вам сумар медияльной ґрупы ЛЕМ.фм+ на ден 31. марця 2025 р.

ХХV Форум Війтів, Бургомайстрів і Президентів Малопольщы

В днях 26-28 марця в Буковині Татряньскій проходило ювілейне ХХV Форум Війтів, Бургомайстрів і Президентів Малопольщы. На подію орґанізувану Фундацийом Розвитку Локальной Демокрациі і Малопольскій Інститут Територяльного Самоуряду і Адміністрациі прибыли лідеры локальных соспільности, експерты і представникы воєвідскых власти. Головном цілю Форум была выміна досвідчынь, здобываня нового знаня та омовліня актуальных проґрамів і вызвань для реґіону. Важным пунктом были стрічы з екпертами з обшыри унійных фондів, охороны середовиска і социяльной політикы. Єдном з головных тем Форум были можливости позыскуваня середків з проґраму Европейскы Фонды для Малопольщы 2021-2027. Маршалок воєвідства Лукаш Смулка підкрислил, што темпо контрактуваня фондів приспішыло, што перекладат ся на реальны інвестициі в реґіоні. Маршалок заповіл дальшы інвестициі: од пляців забав і ґімнастичных галь, по модерный желізничый табір. Воєвідство хоче зміцнити і Охотничу Пожарнычу Страж – пріоритетом сут медичны школіня для пожарників. Воєвідство заінвестує і в охорону середовиска. 15 самоурядів уж отримало дофінансуваня з буджету воєвідства на розбудову канализацийных сіти. На дальшы проєкты мало бы быти схоснуваных аж 400 млн злотых з Державного Пляну Одбудовы.

В Нижньошлезскым Воєвідскым Уряді бесідували о меншынах

Як інформувала Полномічна Нижньошлезской Воєводы дс. Нацийональных і Етнічных Меншын Марийоля Абкович, в четвер 27. марця в Нижньошлезскым Воєвідскым Уряді во Вроцлаві стрітила ся з заступцьом директора Департаменту Реліґійных Віроісповідань та Нацийональных Меншын та Секретарьом Спільной Комісиі Уряду та Нацийональных і Етнічных Меншын Ксеньом Альгаґ. Бесідували о вызванях в контексті евалюациі ромского проґраму, освіті меншын на Нижнім Шлеску і задачах, якы стоят перед полномічныма, але і представниками меншын.

IV едиция конкурсу «Спадковина Лемків»

Як інформуал Повітовий Осередок Психолоґічно-Педаґоґічного Порадництва і Методичного Дорадства в Польковицях, в середу 26. марця тр. одбыл ся IV Меджеповітовый Конкурс для Нацийональных і Етнічных Меншын – «Спадковина Лемків». Акцию орґанізує што рока методичный порадник Дорота Максимчак. Ученикы, котры ходят на лекциі лемківксого языка, могли взяти участ в конкурсі знаня і плястичным завдякы гостинности Дирекциі Шкільно-Предшкільного Комплексу в Радваницях. В конкурсі знаня в катеґориі кляс 1-3 перше місце заняла Мария Трохановска, а другє місце Емілия Ключка. В клясах 4-8 перше місце занял Давид Копча, другє Анастазия Кєц і третє Александер Каня. В плястичным конкурсі в катеґориі предшколя перше місце заняла Антонина Феш і другє Пьотр Зюлковскій. В клясах 1-3 перше місце занял Оскар Закшевскій, другє Лілияна Пласконь і третє Ігор Кунцік.

Одтинок воєвідской дорогы 971 в Жеґєстові буде запераный в ночы

Припоминаме, што од заране – 1. квітня/апріля одтинок воєвідской дорогы нр 971 в Жеґєстові буде запераный в годинах 20.00-6.00 од понеділька вечером до суботы рано. Зачне ся черговый етап робіт при осувиску. Дальше буде обовязувало ограничыня тонажу до 7,5 тоны в годинах 6.00-20.00 і дни вільны од працы. Пляново дорога буде в ночы заперана до кінця мая. Єднак, як інформує выконавця, термін тот може ся змінити в залежности од етапу заплянуваных прац, але і утруднінь звязаных з ноторичным недотримуваньом переписів односно тонажу.

Фот. Нагородженый рисунок в конкурсі «Спадковина Лемків».
Джерело: FB Powiatowy Ośrodek pppidm