Сумар дня на 31. мая 2022 р.

Приносиме вам сумар медияльной ґрупы ЛЕМ.фм+ на ден 31. мая 2022 р.

Уж можете достати новый номер лемківской «Бесіды»

Явил ся новый номер часопису Стоваришыня Лемків «Бесіда», ч. 3 (186) за місяці май/червец. В найновшій «Бесіді» в більшости находят ся раялциі з упамятнінь 75. річниці Акциі Вісла, якы проходили 30. квітня/апріля в Явожні, Біличній, Устю Рускым і Ґорлицях. В часописі нашли ся тіж дописы про нагороджыня Лемківской Едукацийной Загороды в Ґладышові, переклад вершів Петра Мурянкы на шлезскій язык ци выставу пн. «Лемкы» в Музею русиньской культуры в Пряшові. Новый номер помістил і дописы про округлы річниці народжыня Івана Мациньского і смерти Теофіля Качмарчыка. В посліднім выданю прочытаме тіж одозву Михала Гайтка до Ясюнчан і вшыткых люди, якых рід выходит з Ясюнкы. Автор одозвы просит о контакт каждого, хто хоче спомочы выданя книжкы про рідне село. В новым двомісячнику почытати годны сте спомины Гавриіла Костельника про выгнаня з Білцаревы ци оповіданя Семана Мадзеляна пн. «Великден».

Музей Дворы Карвациянів і Ґладышів в Ґорлицях доціненый в воєвідскым конкурсі

І того рока Стоваришыня Ґмін і Повітів Малопольщы признало премію «Лідера Малопольщы», а серед 10 лавреатів нашла ся інституция з Ґорлиц. Бесіда о Музею Дворы Карвациянів і Ґладышів в Ґорлицях. Выріжніня признаваны сут за найважнійшы для соспільства подіі, котры тыкают ся духовой, достоменной ци едукацийной части жытя, але тіж за інвестициі звязаны з новыма технолоґіями ци творячы новы місця працы. Конкурсова капітула своє рішыня нагородити ґорлицку інституцию арґументувала активном діяльністю музею для наукы, едукациі і культуры. Музей бере участ в едукацийных процесх м.ін. через богату оферту выстав, концертів, варшатів ци науковых конференций, при чым промує новы способы передаваня знаня. Музей опікує ся тіж культуровом спадковином лемківской меншыны.

Новый Роверовый Пут получыт два головны міста в двох ґмінах польковицкого повіту

Траса долгости 13 км. получыт Ґрембоціце і Польковиці. В тот спосіб жытелі обох ґмін будут мочы ся переміщати безпечным і еколоґічным середком комунікациі, котрый тіж буде цікавым розвязаньом дла туристів. Як передал війт ґміны Ґрембоціце, в протязі найблизшых 2 місяців зачне ся будова новой інвестциі. Згідні з пляном, новый пут буде готовый кінцьом 2023 рока, але можливе, што поєдны одтинкы будут доступны дакус скорше. Кошт будовы роверового пути разом з модернізацийом повітовой дорогы, вздолж котрой буде ся вила стежка, то 15 млн злотых. Як підкрислил бургомайстер Польковиц, то перша в повіті меджеґмінна роверова траса. Перша, але не послідня, бо то допіро початок реализациі концепциі Мідьового Роверового Пути, котрый закладат будову 300 км роверовой трасы при спілучасти 19 самоурядів з польковицкого повіту.

В Святковій Великій зміны на дорозі

В минулым тыжни інформували сме о часовым зужыню повітовій дорогы з Контів до Святківкы на короткым одтинку в Святковій Великій. Як же поінформувал повітовый Заряд Доріг в Яслі, зо взгляду на конечніст провести аварийный ремонт дорогы, сес одтинок єст цілком вылученый з руху. Рішыня спричынене тым, што осунула ся дорога, а тото являт ся загорожыньом не лем для безпекы руху, але тіж вадит частичному лем ремонтови. Закрытя дорогы обовязує од 30. мая до 10. червця/юнія. На тот час вызначено обізды через ґмінну дорогу в селі Котань та воєвідску дорогу но. 992.